智取大市 - 晉佳 2018年8月20日
智取大市：計定數吼特價貨
■舜宇光學主席葉遼寧（右二）及行政總裁孫泱（左二）。 資料圖片
周六淩晨人幣急彈，刺激港股ADR反彈約300點，但點數遠未足以確認轉角訊號。以大部分股價計，尚未算特價時段，目前能做嘅事，第一，諗定再跌嘅話，乜水平才有胃口；第二，備忘長線好股。先講第一點嘅例子。
值得參考嘅股價圖，就係中興（763）同俄鋁（486），兩隻都因應利淡消息而曾經重挫，單日裂口狂跌未見底，然後回穩極短時間，再有一兩棍大陰燭，才進入短線反彈，隨後便死蛇爛鱔橫行一段日子。因國策而裂口狂跌嘅教育股，同埋業績遠遜預期嘅舜宇（2382），下跌形式同俄鋁、中興相似，但劇本未行完。
中興及俄鋁模式老是常出現，皆因突如其來壞消息令基金單日沽唔切貨，斬倉盤按捺不住焗沽，絕望式拋售沽出個底部來。舜宇上半年手機鏡頭付運量增長五成，新訂單毛利較低，前景打折扣，但撇除人幣下跌影響，盈利有逾兩成增長。目前29倍歷史PE，相對已非神奇超卓嘅基本因素，唔夠平賣，如果重覆中興俄鋁劇本，跌到低過80蚊、26倍又如何，一個月跌五成算超賣，真係到呢啲價樓下，便算短線特價。反彈吸引，但荷包更可貴，計定數睇形勢才行事。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com