金融High Tea - 陸羽仁 2018年8月23日
螞蟻蟄伏係好消息
2018年08月23日
美股喺中美貿易談判前炒消息，竟然炒到創新高咁高興。雖然中美雙方事前對談判成果降溫處理，但見美股升得咁高興，港股都跟升繼續彈，從大市公用股跌到科技股升，可見資金都仲係玩緊換馬，只是風險胃納提升，並無大舉回流，後市都仲係睇住中美談判結果嚟炒。
中美埋枱細節曝光
中美埋枱，談判具體議程逐步曝光，包括要求中國推高人民幣匯率，繼續開放市場，加快美國金融機構喺中國發展業務，雙方先嚟隔空過招。北京方面話，喺美國一大堆條件中，部份不可接受，包括開放雲業務涉及國家安全考慮，屬於難以退讓領域。中國官員咁講法可以有兩面解讀，從強硬一面睇，北京有本身底線，不會犧牲原則為求達成協議。而從樂觀一面睇，大堆條件中好多都有得傾，中國已經準備咗禮物畀美國，關鍵係美國攞唔攞啫。美國既然搵得中國傾，理論上都想有好結果，所以個市就炒咗上去先。
美股前晚創新高，標普500指數昨日一度觸及歷史高位2873點，升幅0.6%，收市升0.2%，報2863點。升市主力係傳統股好似波音，市場主要炒作中美貿易談判有好結果。
來到昨日亞洲時段，內地A股反應審慎，上證指數收報2714點，跌19點；深成指數收報8454點，跌94點，港股就跟咗美股有得反彈，但升幅主要係跌得殘嘅科技股。恒指收報27927點，升174點；國企指數收報10850點，漲112點，成交1004億元。騰訊(700) 宣佈業績倒退後，壞消息消化持續反彈，收升2.5%，報359.4元；中期少賺16%的瑞聲(2018) 毛利率持續下滑，股價一度急挫逾10%，低見78元，收市升1.3%，報88.35元。金山軟件(3888) 稱內地暫停遊戲審批，對集團業務影響不大，收漲7.8%，報15.56元。科技股反彈潮中，被視為科技含量高的保險股中國平安(2318) 一度升近5%，漲3.5%，收報72.8元。
平保剛剛公佈嘅半年業績幾靚仔，集團純利按年上升33.8%，至581億元人民幣，主要得益於壽險業務表現，金融科技及醫療科技業務的利潤貢獻明顯提升。得益於營運利潤快速增長，平安提升現金派息水平，向股東派發中期股息每股0.62元，按年上升24%。期內集團兩間科技公司平安醫保科技，於年初完成11.5億美元融資，吸納投資後估值88億美元；金融壹帳通上半年完成7.5億美元融資，投資後估值為75億美元。平安好醫生(1833) 則於5月在香港聯交所主板上市。至於市場關注幾時上市的陸金所，據報亦快速增長。
平保績佳乘勢反彈
平保報佳音有好反應，可能同螞蟻金服押後上市有關。據外電報道，阿里巴巴同系的螞蟻金服會再度延遲上市計劃，估計明年底前都不會上市，甚至數年後才會上市，因為集團與騰訊旗下微信支付競爭加劇，需要持續投放資金吸客。同一時間，政府對非傳統銀行金融機構監管加大，都為螞蟻金服上市帶來阻力。
螞蟻金服傳出暫不上市的消息，暗示佢準備繼續燒錢，騰訊可能都要諗吓點拆招，亦有可能係市況轉差，市場對唔賺錢或燒錢的科技股俾唔到高估值。不過，正如陸羽仁所講，科技股狂上市等同猛印股票吸水，O依家少咗隻大嘢抽水，變相係好消息，好似平保手頭的陸金所能夠賺錢，咁就成為其中一個主要得益者。
陸羽仁
金融High Tea 舊文
來源 source: http://hdfin.stheadline.com