異動空間 - 魏力 2018年11月9日
異動空間：炒股最忌三個字 - 魏力
今年低位大機會已出現，後市一係再挾上，一係就行上落市做「收窄三角形」。資料圖片 適中字型 較大字型
個市底位彈2,000點之後，出現一個有趣現象：粉絲或觀眾查詢時，睇淡後市、想搵位put的比例均大幅提升，「最想佢死」的股份，非平保（2318）莫屬。答案通常都係：無理由跌咁少，應該要追跌。
呢種心態同去年牛市搵騰訊（700）去put無分別，覺得佢「無理由升咁多，應該要跌」，即係同市場鬥氣。炒股最忌講「無理由」，因為升跌真係唔需要理由，理由係事後用來自圓其說的。既然今年低位大機會已出現，後市一係再挾上，一係就行上落市做「收窄三角形」，兩種情況下，恐慌都不易再出現，咁你put隻強勢大藍籌的勝算有幾高？
再舉一例，美國中期選舉一如預期，共和、民主黨各取一院，點解美股三大指數可以燒炮仗？彭博電視解釋係「不明朗因素已消除」，你話幾咁兒戲？同話你聽市升因為「買家力量大過沽家」有乜分別？
至於個市，再重申一次，最易博彈的「特價時段」已過，後市就算升都係chok住行，唔會易贏。呢兩日中細股趁氣氛好轉炒上，目標得一個：引出接火棒的下家，散得幾多得幾多。
筆者為證監會持牌人，未持有上述股份權益
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.finance.appledaily.com