大棋局 - Mr. Tregunter 2018年11月6日
大棋局：股市醞釀大反彈 - Mr. Tregunter
股市就算步入熊市都有反彈，而且最猛烈的升幅往往出現於熊市二期，係最難玩嘅一段。 資料圖片 適中字型 較大字型
上星期五恒指大挾1,000點，今個星期一開市倒跌600點，走勢唔靚仔，但個人看法股市正醞釀一次大反彈。
首先，恒指在20000至30000點這個範圍，回顧歷史波幅，1年內通常唔超過8,000點。恒指由33000點跌到24000點，有9,000點，對大戶來講今年波幅已經夠數，如果一年內跌成萬點需要出現系統性風險，現階段不至於。由於波幅夠數，各類基金反而有動機年底炒番上年結。
其次，中美貿易戰有望中場休息。特朗普放風中美有偈傾，堅定流，看一個手影可估算。美國時間11月6日舉行中期選舉，而人民銀行香港時間11月7日在香港推出央票，乃釋出善意之舉。央票即係央行發出票據，銀行畀錢央行買入，會收緊基礎貨幣。人民銀行10月尾宣布會發行央票，即係通知市場準備要夾人民幣。早前美國冇將中國定為匯率操控國，中國夾人民幣回應，其實就係一種外交姿態，中美之爭仍然鬥而不破。故此，今個月底G20峰會，特朗普同習近平有偈傾。
熊二反彈最難玩
其三，美國對華政策並非兒戲，唔會朝令夕改，但都有階段。現階段美國需要收割部份戰果，好讓特朗普顯示自己做到嘢，其後先有底蘊再推各類政策。任何競賽，開波時總係大家腎上腺素上升欲企硬對撼，曠日持久則必然會有人想縮，尤其下風一方。貿易戰中國處於下風，頂層就算想企硬，礙於形勢將有各種壓力要求退一退，現時正處於此階段。
其四，美國副總統彭斯演說是為貿易戰分水嶺，能夠公開講嘅幾乎都已講出口。美國深明若逼到中國無路可退，只會引來中國放手一博。所以言下之意，內文雖無期限卻為最後通牒，要求中國現階段放一手。中國想美國中期選舉後先傾，並非認為選舉會出現戲劇性改變，只係在等如果民主黨能奪下眾議院，再同特朗普談判可以收遜啲；若共和黨大勝，則照舊條件傾，亦無大礙。呢種國家級大談判，雙方仍然要鍊價到最後一刻。
其五，現時市場普遍共識，都認為長期唔掂，已進入熊市。劇本雖然咁樣走，但中途總有浪花。港股今年6月洗頭艇走勢告終，跟住一路向下插，期間並無似樣反彈，只有矮仔落樓梯，一浪低於一浪。不要忘記，就算熊市都有反彈，而且最猛烈的升幅往往出現於熊市二期，熊二亦係最難玩。獵犬終須山上喪，炒賣老手判斷頂底通常不會偏離太遠，錯過了亦能立即反應，但最易喺半山腰中伏。故此個人看法估計，股市現時到年底左右醞釀大反彈，玩唔玩請自行斟酌。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com