魚樂無窮 - 唐牛 2019年1月3日
魚樂無窮：我最喜愛的股票 - 唐牛
筆者長put美團點評，盼成今年「我最喜愛的股票」。 適中字型 較大字型
香港今日有兩個talking points，第一係古天樂勇奪我最喜愛男歌手獎，第二係港股紅盤喪插715點或2.8%，唔知因為樂壇黑天鵝出現咗，抑或大家對跌市習以為常，昨日跌幅雖創逾廿年最差紅盤表現，但未見太大恐慌。
古天樂講得獎感受，劈頭兩句「我真係好鍾意唱歌，不過我唔識唱箒。」股民心裏也是同一番話，只是變成「我真係好鍾意炒股，不過我唔識炒箒。」大市小漲大回，個股九死一生，坐貨贏錢難度極高，做熊軍看似劃算，但夠膽all in嘅又有幾人？現在手揸大量現金先叫識炒。
作為演藝人協會會長，古天樂話同好多歌手食飯，發現佢哋團火無熄過；我日日寫專欄、做節目、睇通告，其實對股市團火都係有增無減，吸收的資訊一時三刻未必有用，但長遠來說定可發揮功用，終有一天苦盡甘來。
現階段繼續坐實三類股票︰高息股、績優股及潛在私有化股，有跟開本欄的戰友，大概估到係乜冧巴，同時造淡新經濟股，只求拉上補下取得正回報，不奢望大茶飯。美團點評（3690）業績曳爆，依然有2,000幾億市值，長put不作他選，希望可順利當選今年「我最喜愛的股票」。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com