灌水浮球益內房
2019年01月31日
雖然市場觀望中美高級別經貿會談及聯儲局議息會議，但港股走勢仍然不俗，於期指結算日又出現最後U盤嘜高至全日高位，收報27642點，升111點，再創四個月收市高位。喺中美貨幣政策漸吹鴿風下，資產股表現突出，尤其是內房受惠灌水浮球效應。
幣策轉向作用浮現
美股繼續跟住業績走，加上中美貿易談判結果未定，氣氛有啲飄忽，恒指早段一度跌161點，見全日低位27369點，但午前開始回穩，最終收升111點，報27642點；國指則收報10897點，升29點，成交金額略增至948億元。
去年12月份美國加息，華爾街大鱷狂鬧聯儲局，到最近內地經濟大大降溫，陸羽仁就一再強調，資金供應正在轉向，央行由收水慢慢走向中性甚至變為放水，呢個趨勢對資產股有利，當中又以人行最為手鬆。雖然內地放水唔會直接支持內房商，但係大水灌洞，大球小球都會浮起，內房股因而可以看高一線。呢個估計其後開始出現，近日更加明顯。
內房股今個星期紛紛跑贏大市，碧桂園(2007) 昨日收漲近5%，報10.76元；潤地(1109) 收升3.6%，報30.55元；中海外(688) 漲2.7%，收報28.95元，三者齊齊成為升幅頭三大藍籌股。其他內房股方面，融創(1918) 收彈5.8%，報30.05元；富力(2777) 收漲5.3%，報15.24元；世茂房地產(813) 收升4%，報21.55元；萬科(2202) 收升3.7%，報31.05元。最特別係內地傳媒報道，龍光地產(3380) 主席涉嫌行賄，股價曾挫8.3%，低見9.35元的逾一個月低位，最終收升3.2%，報10.52元。
內房股紛紛起飛，有一說法係受惠人民幣匯價走強，陸羽仁認為係「為股升搵解釋」，真正始終係灌水作用。由於呢個轉向作用好大，唔會一、兩日就會完全反映，低位未買內房，可以等回落考慮買啲，手頭有貨急升可以食咗部份胡先，但都唔使太快清貨。
同樣受惠利率前景偏軟嘅係本港地產股。市場憧憬美國聯儲局「放鴿」，本地地產股造好。恒隆地產(101) 去年盈利80.8億元，雖然成績一般，股價仍走高逾1%，收報16.84元；強勢股新地(016) 高見132.2元，創近一年高位，收升0.9%，報130.8元；恒地(012) 收升0.8%，報44.3元。領展(823) 再創新高，高見85.6元，但收跌0.4%，報85.1元。
環團倡漁塘解地荒
本港地產股造好嘅另一個原因，係上月發表嘅覓地報告無料到，市場意識到要短期增加供應，只有同發展商合作，喺現有土地度橋，例如增加建屋密度，另一個就係喺邊緣綠化地做工夫。有中環茶友留意到，有個叫香港濕地保育協會嘅組織，舉辦咗一場「后海灣濕地可持續性研討會」，會上有人提出政府換地，容許將部份魚塘起樓，換取資源保育魚塘。茶友話，將部份廢棄魚塘起樓嘅做法，喺香港其實都有先例。有發展商試過喺魚塘起樓，同時將鄰近大片魚塘變成生態公園，成為居民設施之一。喺未進行計劃前，呢啲廢棄魚塘因為無人打理，加上缺乏資源，變成生態價值好低嘅無用資源。但喺保育後改善水流，清理堆積嘅廢物，就變成適合候鳥棲息嘅沼澤。最重要嘅係，呢類方案唔少環保人士都支持，喺短期覓地唔易下，呢個係可行方法之一。
O依家新界土地，無論係農地抑或濕地，好多都喺晒幾個大地產商包括新地、恒基、長實(1113) 同新世界(017) 手上。若然政府唔願意開放呢啲土地資源，樓宇短缺無法解決，樓價高企，對佢哋無壞；若然容許換地，呢啲公司又會得益，點計發展商都冇得輸，至於點揀就由市民同政府決定，所以覓地小組搞唔出辦法，地產股就一直表現強勢。
除咗中港地產股外，最多人關注嘅藍籌股騰訊(700) ，旗下再有一個遊戲獲批，名叫《浪漫玫瑰園》，令股王支撐大市，收報344.2元，升0.53%；相反，發盈警嘅國壽(2628) 逆市挫1.87%，收報18.9元。
陸羽仁
金融High Tea 舊文
來源 source: http://hdfin.stheadline.com