魚樂無窮 - 唐牛 2019年2月14日
魚樂無窮：牛氣沖天炒乜好 - 唐牛
進入業績高峯期，投資者炒盈喜股、績優股勝算較高。
資料圖片 適中字型 較大字型
如果抹去2018年的走勢，齋睇昨日的市況，你會以為自己身處牛三。十大升幅榜冇兩成進賬都入唔到榜，恒指成份股瑞聲（2018）狂升12%，資金在各個板塊輪動︰券商股、5G概念股、手機設備股，完美演繹百花齊放。正當大家認為位高勢危之際，根據贏谷輸縮策略，在倉位有一定利潤情況下，我會炒到爆為止，賺頭蝕尾總好過彈出彈入（清完倉又高追過）。
有戰友問甚麼板塊落後追得過，根據落後只會繼續落後的邏輯，實在不宜亂出手，相反進入業績高峯期，炒盈喜股、績優股勝算其實更高。還記得叫大家博盈喜的浪潮國際（596）嗎？一個月時間已累升近三成，強到無倫；在另一平台推介的雅生活服務（3319），昨日亦大成交搶高一成，話唔定係春江鴨收到風好事近了。
大同機械（118）也屬潛在盈喜股，現時仍處多年低位的海底價，具備一定值博率。集團因出售資產錄得特殊收益，中期盈利已較上一年度全年高，本業注塑製品及加工業務同樣亮麗，中期分部業績勁升8倍，雙引擎帶動下，全年成績表含金量甚高，現價去番大股東去年增持價0.55元，都有近兩成水位！
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com