金融High Tea - 陸羽仁 2019年2月15日
大錳盈喜可衝浪
2019年02月15日
中美貿易談判準備再「埋牙」，今次傳出兩國主要係整理出一個框架協議。由於時間有限，有傳美國總統特朗普可能考慮用外交談判處理死線嘅一種方式︰Stop the clock(按停計時器)，延長死線。股市短期走勢，就要等埋今日本輪談判結束雙方嘅公佈。
友邦逆升顯強勢
美國債務問題近日再惹起關注，聯儲局前主席格林斯潘(Alan Greenspan)接受彭博訪問時形容，美國聯邦政府年度財赤趨向一萬億美元嘅情況係極端失衡，又指美國已開始步向滯脹，即經濟增長呆滯同通脹高企，但目前尚未進入。
格林斯潘之前已經講過，美國有滯脹威脅，令美股牛市結束。美國最新就業數據顯示，勞動市場仍然緊張，呢個狀況有利維持消費，但同時擔心工資升得太快，會引發通脹，加上美國有大量債務，若然缺乏買家，咁美息就可能要加。當美股由低位反彈後，開始有人議論美債話題。暫時而言，美債憂慮仲未受到廣泛關注，但當股市升到咁上下，可能就有人拎出嚟做文章。
格林斯潘提出美國債務太重導致滯脹，有中環茶友笑言，作為中央銀行前高官，格老特色係關心遠慮，正如多年前佢公開警告美股有唔理性亢奮，結果股市再大升一兩年先跌。他講嘅美債危機唔可以話唔存在，但係幾時爆就唔易估。從投資角度睇，要留意嘅係債息由上月開始反彈，近日遇上阻力，如果債息持續回升，咁就開始要小心。
港股噚日觀望貿談結果，指數波幅不大。恒指下滑65點，收報28432點；國企指數收報11170點，跌28點，成交1038億元。友邦(1299) 逆市上揚0.4%，收報74.8元，再創一年高位，顯示強勢股本色；滙控(005) 逆市漲0.2%，收報67.2元。個別板塊中，國務院發《國家職業教育改革實施方案》，預期清晰政策有利上市教育股，新華教育(2779) 急漲11%，報2.79元；希望教育(1765) 升8%，報1.17元；民生教育(1569) 升7%，報1.75元；中教控股(839) 升5.4%。
大股個別發展，有股仔逆市上升。中信大錳(1091) 日前發盈喜，預期截至2018年12月31日止年度純利將大增逾倍。大錳股價連升幾日，昨日再逆市上升4.3%，報0.49元。
估值仍低風險有限
中信大錳主要生產煉鋼必須使用嘅錳金屬，公司業績勁升，主要係舊年主要產品電解金屬錳(EMM)平均售價上升超過15%。由於礦石產品銷售價格上漲，同埋成本下降及其他原因，令加蓬礦項目利潤貢獻增加；因公司根據市場對電動車輛、電力存儲同電子產品使用嘅可充電電池需求快速增長，從而改變產品組合結構，令電池材料產品電解二氧化錳同錳酸鋰產量及利潤貢獻增加。
按照公司盈喜嘅水晶球，以2017年盈利1.4億元推算，2018年料達2.8億元以上。扣除上半年盈利，估計下半年所賺唔少於1.95億元。
如果按照獲利2.8億計，去年每股盈利8.17仙，現價預測市盈率5.7倍。
雖然公司盈利波動影響估值，但低估值加上好消息支持下風險唔高，大可作為短線小注衝浪目標。不過亦要留心大錳成交較低，升一輪之後會重歸平靜，所以上咗車要識落車至好，亦要訂好10%止蝕作護身符。
陸羽仁
金融High Tea 舊文
來源 source: http://hdfin.stheadline.com