石油板塊跟炒記得食胡
2019年02月19日
港股昨日跟隨外圍受貿談利好消息刺激攀升，指數最多升逾500點，收升446點，升幅1.6%，大市成交金額950億元。但係無論升幅同成交，都係畀A股比下去。
中美喺北京開會後，朝住先達成諒解備忘錄方向努力，內地股市甚為興奮，上
證指數收報2754點，升71點，升幅接近2.7%；深成指數收報8446，升321點，升幅更接近4%。中美角力始終內地受衝擊較大，A股回調幅度遠超香港，跌得勁自然彈得多，呢個都係合理反應。有投資專家認為，今年A股係最值得關注市場，背後應該都係對中美貿易談判抱住較樂觀睇法。
央行變「鬆弛熊」推高油金
喺升市中，油股同金股表現不俗。各國央行今年紛紛變成「鬆弛熊」，對利率前景鷹風不再。銀根趨鬆理論上對商品資產如黃金、石油都比較有利。金價喺1200美元打底一、兩年，舊年下半年拾級而上，最近仲升穿1300美元。招金礦業(1818) 噚日升上8.44元收市，升3.6%，仲創出一年高位。
油股升勢同資金流向有關係，但同時有不同理由。美國加強打擊委內瑞拉，又同伊朗展開罵戰，油價地緣風險始終難降。另一方面，內地有報道指，國家石油天然氣管道公司組建方案已獲批，新公司將通過收購「三桶油」存量相關資產，並將尋求上市，推動三桶油造好。
三桶油中以中石油(857) 升幅最多，收升4.6%，報5.21元，榮膺藍籌股升幅榜首位；中海油(883) 升3%，報13.68元；中石化(386) 升3.2%，報6.72元，若然早前趁公司炒燶油消息執平貨，O依家回報有30%，確係相當和味。油服股都造好，海隆(1623) 大升14%，收0.88元；安東油田(3339) 收升9%，報0.96元；宏華(196) 收0.51元，升6%。
自從特朗普上台後，油價畀佢搓圓撳扁，佢為咗降低油價不惜大出口術。另一方面，美國不斷觸動地緣風險，油價跌完又彈，加上央行開始減慢加息步伐，油股又升番上高位。油股有特朗普操控嘅政治因素，升得多佢就會出口術壓低，所以唔會直線上升。如今油價破位向上，油股、油服股都開始郁，唔排除跟住仲會有多浸升浪，穩陣計揸油者等佢升多一浸後，可以分段食胡，買賣呢類商品股要掌握節奏，記住上車要識得落車，油服股波動性大，成交亦冇咁多，所以記住要識食胡，但短期可能係急升局，短炒一下無妨。
滙控績前先「升」奪人
石油板塊亮麗之餘，喺大升浪下，今日公佈2018年全年業績嘅滙控(005) 先升2%，報67.7元。彭博引述市場預期，去年收入548億美元，經調整純利為152.2億美元，每股盈利0.757美元。同日公佈業績嘅恒生(011) 收升1.59%，報185.6元；中銀香港(2388) 升4.4%，報32.05元。
內地全力加快5G建設，深圳正加快發展。《深圳特區報》引述工信部估算指，中國商用5G喺頭五年直接帶動經濟總產出將超過10兆元人民幣，經濟增加值將超過3兆元，創造就業機會超過300萬個。5G概念股繼續強勢，中國鐵塔(788) 見1.84元，再創上市新高，收升3.4%，報1.83元；中興通訊(763) 下個禮拜公佈首款5G旗艦機，股價高見19.8元，收升9%，報19.72元；京信通信(2342) 升4.5%，報2.33元。
多隻半新股創新高，海底撈國際(6862) 創新高，一度升6.3%，見21元，收升1%，報19.96元。海底撈舊年9月26日以招股價17.8元上市，低見15.5元。部份半新股喺淡市中招股，貨源歸邊後就見炒上，呢類股份炒上有時唔使睇理由，總之衝浪就要留意適當時候落車。
陸羽仁
金融High Tea 舊文
來源 source: http://hdfin.stheadline.com