嚴控走資反利港交所
2019年02月28日
美國總統特朗普去咗越南同北韓金仔開會，外圍冇乜特別消息。香港噚日政府就發表咗《財政預算案》，喺大市場、小政府嘅思維下，對投資氣氛影響有限，指數浮浮沉沉，最後略為下跌收市。
今年《預算案》冇錢派，幾粒糖都減甜，財爺解釋係盈餘大
幅減少。庫房入水冇舊年咁多，一嚟係因為有兩幅地流標，當中包括一幅山頂大地，另一個原因就係股票印花稅大減。
內地資產上市變相套現
港股喺舊年第二季開始下滑，交投跟住收縮，連政府稅收都受影響，喺咁嘅環境下，港交所(388) 公佈2018年全年業績，股東應佔溢利93.12億元，按年增長25.77%，每股基本盈利7.5元，第二次中期息每股3.07元，都算幾叻仔。
派成績表後，港交所股價向上，一度創一年高位，但收市就回吐跌2元，報268元，有啲趁好消息出貨嘅味道。
港交所盈利可以唔受交投下跌影響，主要受多新股上市所賜。
陸羽仁同中環財主傾起近日內資動向，佢直言中央繼續嚴控資金。內資冇辦法調錢落嚟香港，一個副作用係來港上市興趣增加，因為來港上市等如將資產套現，可以拎到境外資金。
財主話，只要內地繼續嚴控資金，內資上市興趣都會維持，對港交所吸引資金上市有利。不過，港交所市盈率都差唔多36倍，趁好消息食胡係正常反應。
受制A股破關後倒跌
港交所近期表現咁強勢，都因為大市回調下跌，跌開嘅手機股就一瀉如注，繼續反覆下插。瑞聲(2018) 日前發盈警，股價跌勢未止，收跌4.95%，報48元，為跌幅最大藍籌股；丘鈦(1478) 收跌3.6%，報6.4元；舜宇(2382) 收跌2.6%，報93.55元。瑞聲盈警俾大行唱淡後，股價連跌兩日，同一板塊嘅舜宇光學都受到壓力。
瑞聲科技喺一年前畀人熱捧，當時估值遠高過賣手機最好賺嘅蘋果公司。
陸羽仁一再提醒，將周期性嘅製造業公司當增長股炒，呢個現象唔合理。
喺最近嘅電訊產品發佈會議上，可摺疊屏幕手機大出風頭。陸羽仁舊年參觀過深圳一間做呢類柔性屏幕手機嘅獨角獸公司，由於業界睇好呢個概念，該公司未賺錢估值已達三、四百億元。可摺疊手機暫時訂價好貴，係咪能夠成功仍屬未知之數，但對手機市場肯定有影響。若然概念成功，對蘋果必然構成衝擊，若然失敗，換機熱潮好難出現。
由於O依家正處於換機尷尬時期，行業仲要喺低谷死捱，大行見到呢個情況，就唱淡手機設備股，所以雖然股價下跌，投資者都要緊記便宜莫貪。
由於缺乏重大消息，恒指期指結算日走勢反覆，一度升穿二萬九，高見29014點，創七個月新高，惟午後受制於A股，走勢轉弱，收市倒跌14點，報28757點，成交1210億元，連續六個交易日成交過千億元。
藍籌股方面，友邦(1299) 破頂，高見77.95元，收升1.65%，報77元；反而內險股受壓，國壽(2628) 跌2.5%，報21.75元；平保(2318) 收跌0.7%，報82.75元。
另外，多隻新能源汽車股向下。正道(1188) 收插17%，報0.055元；電池股天能動力(819) 收瀉10%，報7.61元；比亞迪(1211) 去年少賺31%，股價收跌4.5%，報50元。
陸羽仁
金融High Tea 舊文
來源 source: http://hdfin.stheadline.com