收市閒情 - 千頌C 2019年5月15日
馬上成為壹會員
會員註冊/登入
【收市閒情】中國屋漏逢夜雨 - 千頌C
面對貿易戰，中國主要有兩大驚，第一驚係糧食危機。資料圖片 適中字型 較大字型
中美貿易戰拳來腳往，特朗普上周以中方反口為由，決定對2,000億美元貨品，提高關稅至25%。稅就喺上周五加咗啦，中方當然不能示弱！本周一就決定，「我們也加25%！」領導做得好，做得妙，我們今晚就加好不好？「不要！沒有啦，我們得勢且饒人，下星期……不……下個月才加。」領導威武！那我們加多少個億，2,500億OK？「好……不！站住！我們哪有2,500億的籌碼……就600個億就好啦。」結果，中方就係用600億反擊美國嘅2,000億，你話啦，中國係咪真係唔驚？
中國主要有兩大驚，首先，糧食危機！唔係呀化？中國地大物博，都會驚冇嘢食？是咁的，中國自貿易戰開波後，就三次清查糧倉，要摸清家底。與此同時，到周一，北京市突然推出「糧油價格波動的緊急應對方案」，簡單講，即係對粳米、食用油呢類作價格監控。發改委就話，「考慮到中長期糧油市場面臨複雜國內外環境可能帶來的價格上漲壓力」，實際係怕貨源緊張，有人囤積居奇。
咁你話中國唔驚糧食危機？最慘係咩呢，你查糧倉呀嘛，你唔查由是可，一查就真係起火，上年8月查倉後，唔少糧倉發生離奇失火，呢個係第一個慘。
第二個慘係，中國非洲豬瘟疫情，已達到災難級；一波未平，一波又係，中國又已經爆發蟲災！現時「秋行軍蟲」肆虐中國，呢隻蟲可怕之處係，繁殖力強，飛行能力佳，喺中國冇天敵，加上暫時未有有效大規模撲殺，一旦出現，可以講係冇佢符，更會對稻米、大豆與粟米等重要農作物帶來嚴重影響。本來中國向美國大豆徵25%關稅，就諗住自己增加大豆產量，但𠵱家個如意算盤打唔響，所以加稅清單亦都冇大豆份。
咁第二個驚係咩呢，當然係特朗普個Twitter啦，一日十幾廿個tweet，你點知佢幾時發作呀？
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com