搞完中國搞伊朗
2019年05月16日
美股早前因為中國推出貿戰反制措施下跌，美國總統特朗普即刻派定心丸，話中美只係「小爭吵」，暗示雙方有得傾，喺口術安撫下，市場情緒稍為平復，港股昨日反彈，最多反彈超過300點，收市升幅收窄，恒指收報28268點，升146點；國指收報10804
點，漲40點，成交金額961億元。市場被特朗普點紅點綠，反應相當神經質。
騰訊業績對辦乏驚喜
特朗普出口術維穩，A股趁機發圍，全日高開高走。上證指數升1.9%，重返2900關口，收報2938點；深證指數漲2.4%，收報9259點。恒指則高開49點，午後受A股抽升帶動衝高，高見28441點，惟尾市顯著回吐，收報28268點，升146點，全日波幅270點；國指收報10804點，升40點，成交金額961億元。大市靠重磅金融股支持，友邦保險(1299) 升2.3%，收報77.4元，貢獻恒指62點升幅；中國平安(2318) 上升1.4%，收報88.85元。
騰訊(700) 公佈首季業績，首季非通用會計準則純利增14%，至209億元人民幣，符合市場預期。由於績前受追捧，旗下遊戲《和平精英》上架五日吸金2000萬美元，刺激股價一度升2%，但午後沽壓湧現，收市上揚0.9%，報374元。睇番公司遊戲業務流水收入按年增長10%，列報收入則按年下跌1%，至285億元，只係不過不失。反而網絡廣告業務方面，首季收入按年增長25%，至133.8億元。社交及其他廣告收入增長34%，至99億元，表現較好。騰訊業績唔算有大驚喜，估計表現都係跟隨大市波動。
油股低可揸高要沽
特朗普喺對華貿易戰線放軟手腳，對伊朗就加壓，伊朗作出強硬反應，有親伊朗武裝組織襲擊沙特阿拉伯石油設施。美國過去同兩伊關係欠佳，喺兩次中東戰爭中打垮伊拉克，但對伊朗一直對峙。由於喺核問題上兩國劍拔弩張，令中東局勢緊張。外界甚至有傳美國會增兵12萬去中東。
不過，美方對伊朗開仗採取低姿態，否認增兵說法。兩伊因為有石油，軍事力量不弱。過去伊拉克號稱全球第五大軍事力量，結果證明同美國完全無得打。伊朗多年來受美國禁運，但西方一直相信伊朗大力發展核威懾力量，所以伊朗軍事威脅唔會比伊拉克細，美伊關係緊張，對油價有支持作用。
對特朗普而言，一方面希望維持全球軍事競賽，以利本身國防工業，但同時唔希望見到油價飆升，以免影響消費者。若然同中國打貿易戰推高入口貨價，油價又大幅上升，對民望並無好處，所以正路講美國對伊朗動武機會暫時唔高。不過喺緊張氣氛下，油股就受支持，中海油(883) 上升1.4%，報13.36元。
油服股更加係全線趨升，中石化油服(1033) 勁漲12%，收報1.01元；惠生工程(2236) 升3.5%，收報1.19元；安東油田服務(3337) 升2%，收報1元；中海油服(2883) 漲1.5%，收報7.57元。油股同油服股早前調整下來，現水平藉消息反彈，但特朗普若然見到油價升得急，好有可能又會出口術壓價，所以炒呢個板塊股份，適宜高沽低揸，過份睇好睇淡都唔適宜。
陸羽仁
金融High Tea - 陸羽仁 舊文
來源 source: http://hdfin.stheadline.com