冰說聰明 - 青冰 2019年6月20日
【冰說聰明】阿里跑輸兩大原因 - 青冰
阿里巴巴回歸港股一事，雖然披露易未見到有申請，但傳聞言之鑿鑿，港交所股價亦因而一升再升。資料圖片 適中字型 較大字型
這一輪的跌浪，港交所（388）可謂神勇，跌得少又彈得快，現價距高位只欠約3%，究其原因，應該是阿里巴巴將回歸，雖然在披露易網站仲未見到巴巴的申請，但傳聞言之鑿鑿，話委託了保薦人，又話一拆八減入場費，便利香港散戶，港交所梗興奮啦，現時巴巴在美國日均成交逾2,500萬股，即係每日約有200億港元成交，吸一半過來，小加肯定爽死了，如果屆時招股價可以比ADR有較大折讓，散戶更加開心。
現時第二大股東Altaba因為想解散旗下基金，在5月中宣佈會全面沽出所有巴巴的持股，消息一出，巴巴股價在兩星期內由180美元，跌至147.95美元，但佢哋透明度都好高，每星期五會在官網update一次現時的持股，消息公佈後約4星期，共沽出了8,370萬股。截至上周五，仍持有1.99億股，以這個速度，沽多十星期就會清倉喇。
雖然巴巴首季業績靚數，但次季的股價表現就較遜色，累跌9%，次季納指就升3%，FAANG五大巨頭全部跑贏巴巴。中港科技股，現時最怕侵侵加完三千億貨品關稅後，跟住就會向一眾在美上市的中概股開刀，這亦可能是巴巴急急歸來的原因，怕侵侵之餘又有Altaba日日沽，巴巴跑輸都非戰之罪嘅。
按以往慣例，上市交完表都要搞兩、三個月先正式上市，照時序，上市時Altaba應該已經沽完，少了一重沽壓，有助巴巴股價表現。
順帶一提，7年前阿里巴巴在港退市時的上市編號1688，至今仍然懸空，好大機會又拎返黎用，現時1688.com仍是巴巴旗下的B2B網站呀，不過一個咁靚的冧巴，7年都冇人用，說是巧合青冰點都唔會信喇，不過特事特辦留個靚冧巴，總比為建築股整個綠色通道正氣的。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com