智取大市 - 晉佳 2019年8月14日
【智取大市】冷氣軍師主宰香港 - 晉佳
香港形勢逼在眉睫，仲要等一班北戴河冷氣軍師決定香港命運。 資料圖片
適中字型 較大字型
星期一機場停飛，港股尾市隨即沽盤湧現，反映大戶已設定唔同劇本，例如某特定更嚴重事件出現就會自動沽貨，下一步若有更悲觀情況，自然有同樣沽貨機制，當然唔想有呢啲事情發生。
8.11警暴事件令一眾連登仔嚷著暫停勇武，回歸和理非策略，以免送頭，於是all in逼爆機場，使出經濟七傷拳手段，比8.5大罷工來得更持續，威脅性不減。喺多位中央領導人北戴河開會閉關之際，林鄭冇收到order唔敢作任何反應，港澳辦對上一次記者會，不設記者答問環節，睇嚟領導人出關前，小小官員唔敢為香港事務定調，以免孭鑊。
香港形勢迫在眉睫，仲要等一班喺北戴河嘅冷氣軍師決定香港命運，難怪投資者冇眼睇，恒指沽到25300點牛證重倉區打爆為止。事到如今，只要唔血流成河、同時無損中央威信之下，可以平息近日矛盾就當贏咗，港股先至會大彈。
恒指已跌穿8月6日大成交、大陽燭日嘅低位，表面睇形勢極不利，指數主要係一眾本地股如滙控（005）、港鐵（066）、領展（823）拉低，唔少中資股尚未跌穿8月6日低位，似長短腳多啲，最危險嘅時間，其實都有可能係買入優質股長揸嘅時機，話曬1.13倍市賬率，係殘過衰退價。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com