魚樂無窮 - 唐牛 2019年8月29日
【魚樂無窮】月供股票的關鍵 - 唐牛
投資者如想月供股票，投資年期一定要長，講緊起碼三五七年，咁樣先可以享受到平均成本法的優勢。 資料圖片 適中字型 較大字型
經過一輪貿易戰消息後，港股再次回歸平淡，加上臨近結算，過倉味道甚濃。市場焦點再次落在環球衰退身上，尤其是美國國債孳息倒掛情況越來越嚴重，美股反彈力度亦明顯不足，一旦再出現驚嚇經濟數據，肯定會有新一輪調整。
另一個焦點在於阿爺提出20招提振消費措施，看似聲勢浩大，但當中不少其實是老調重彈，包括催谷汽車及家電銷售等，由於相關板塊乃內需股之中的弱勢股，可謂蟹貨重重，所以噚日高開後沽壓湧現，博在低位彈一棍的戰友（包括我）也損手離場。這個故事教訓我哋，要扶持的板塊一定有問題，股票市場兩極化不變下，炒內需必須搵強中強埋手，你睇早前提過嘅海底撈（6862）及頤海（1579），又在超高估值下破頂了。
早兩日理財急Call節目講月供股票，有睇嘅戰友應該都知道點處理兩電一煤（未睇快啲睇重播），在此想講多兩句。
月供股票的投資年期一定要長，講緊起碼三五七年，咁樣先可以享受到平均成本法的優勢；由此引伸，當一隻股票稍為跌入低潮，便動搖了月供的決心，其實同高買低賣冇分別。緊記，能夠在低位買入優質股，才是股票市場的致勝關鍵，共勉之。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com