智取大市 - 晉佳 2019年9月20日
【智取大市】月供穩膽有變數 - 晉佳
政府醞釀土地收回條例，靠鐵路沿線發展項目食糊港鐵冇乜數。 資料圖片 適中字型 較大字型
近排港股出現一個問題，就係原本儲落一批忠粉嘅優質股，基本因素逐隻出現動搖，好多隻睇唔上嚟，欠缺以前嘅穩陣。
噚日友邦（1299）走弱，相信主要受累美國減息，負利率風潮令保險股息差回報受影響；另一單係路透傳國企南下投資香港消息，不容忽視，如果真係透過呢種方式北水南調，大陸以保險作為走資渠道嘅倚賴可能減少；同時繼國泰（293）之後，匯控（005）杜嘉祺都要喺央視度講句強烈譴責暴力，友邦亦有機會受壓。光環會否褪色？相信係投資者擔心嘅事情。睇圖，友邦日線圖似係醞釀頭肩頂，交投比以前活躍，頸線71.7元不宜失守。
至於港鐵（066），本身估值貴，雖然話曬公用事業，等政治局勢紓緩，車務表現有望重拾正軌，但政府醞釀土地收回條例，靠鐵路沿線發展項目食糊嘅港鐵又冇乜著數，而佢依附政府，紅色資本南下投資香港，亦唔會有佢份。無獨有偶周線亦醞釀頭肩頂，且成交活躍，同樣由穩陣變得不穩。
港股之中，本來已經優質嘅少、劣質嘅多，如果友邦、港鐵呢類月供穩膽都有變數，資金會點走，值得稍後諗一諗。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com