【大茶飯】Naspers分拆 為騰訊添沽壓（青冰）
騰訊(0700)的南非股東Naspers決定成立一間新公司，在阿姆斯特丹交易所上市，新公司Prosus將持有全部騰訊股份及一些其他互聯網業務，在9月11日上市，Naspers將持有約75%的Prosus股權，換言之有約25%將售予歐洲投資
者，亦即係話變相減持了四分一的騰訊權益。
Naspers去年3月沽售2%的騰訊股份，作價405元，可謂重擊了股王一下，timing也拿得很準，之後騰訊的光環不再，在內地的遊戲業務也頻受制約，即使今年曾有過小陽春，見過400.40元，但始終都無力再闖405蚊。Naspers股價長年對手持騰訊的價值呈折讓，亦長期被股東問候，股東多次要求將騰訊套現，可能由百零蚊開始叫沽，沽到二百、三百、四百，接近升到五百之時，終於忍唔住要減持2%。
咁減持有冇幫助Naspers股價呢？去年3月份Naspers股價約32萬南非蘭特，上周五的收市價是34.5萬南非蘭特，騰訊較配售價405元，係跌了兩成，Naspers股價係跑贏騰訊兩成幾嘅，但你出手批股，亦間接打殘了股王，究竟係得還是失，真係好難計得清楚。現時Naspers市值是7852億港元，手持29.6億股騰訊，市值9617億港元，換言之市價只反映81%的騰訊價值，衰啲講，你去買Naspers，其實就是用折讓價263蚊買騰訊囉。
控股公司持有優質資產呈折讓，相信港股投資者不會陌生，香港真係好多，強如誠哥的長和(0001)及長實(1113)，市賬率都只是0.6。要釋放價值，大股東增持及公司回購，都係較常用的方法，但來得最爆發性及直接的，始終都是賣資產，你睇唔少中小型股份近年賣樓賣地賣商廈，都會爆升，股東happy，但如果這些中小型股份揸住幢商廈唔去賣，反過來再分拆一間公司上市，而新公司的主要資產就是手持那商廈，玩慣港股的戰友或許都估到，頂，你新公司上市後咪又係會存折讓，呈折讓的公司再持有呈折讓的公司，係有點多餘，是否有利就睇嚇分拆時收到那舊錢，夠唔夠補償了。
戰友可能對Prosus無興趣，對Naspers都無興趣，只想知道騰訊點走，上文比喻買Naspers就是263蚊買騰訊，但唔代表會有歐洲投資者會去買，但在荷蘭上市可能會好一點，不會隔山買牛，又沒有匯率風險，咁可能屆時買Prosus就代表了用290元甚至300元去買騰訊，但青冰估計Prosus的價值難以超越手持的騰訊價值，所以還是會有折讓，好喇作為歐洲基金，其實可以沽騰訊買Prosus的，又或者沽空騰訊買Prosus作一個pair trade，賭佢收窄差價，咁短期騰訊有沽壓，亦屬正常，戰友可以留意返8月26日騰訊的沽空額急增至11億元，而那天亦是Prosus發上市文件的日子。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com