冰說聰明 - 青冰 2019年11月28日
【冰說聰明】誠哥借花敬佛的心意 - 青冰
李嘉誠基金會合共動用了9億去支援零售、飲食及旅遊業，誠哥將國家派的特別息轉贈市民，部份市民又將錢轉贈守護孩子等機構。 資料圖片
適中字型 較大字型
阿里巴巴（9988）周二上市，馬雲唔見人，特首都唔見人，但卻見到巴巴的獨立董事董伯伯，果然但凡國家有重要任務，就會見到佢，兩年前賣咗家族生意東方海外（316），收到一份巨型退休金，又因為買家中遠海控（1919）屬國企，為了得到美國監管批准收購，焗住要將東方海外在美國長島貨櫃碼頭賣走，呢單刁拖拉了咗15個月，終在上月25日完成交割。
根據7月的通函，東方海外賣碼頭將獲利101.5億港元，公司剛在周二發通告，將於12月6日召開董事會，建議派發特別息，獲利百億，如果派一半都相當和味，因為整間公司市值只係281億，派50億特別息，已經佔市值的18%。
再睇嚇股權結構，中遠海控持75%，上港集團持9.9%，而當日為了符合公眾持股的規則，以每股78.67元批股予非關連人士，如絲路基金有6.2%，國投有2%，而誠哥的長和，都有4.99%，簡而言之，這些「自己人」已經揸咗九成半股權，其實怎會不豪派特別息吖。
誠哥當日接了4.99%，就係唔想在權益披露上舉牌，但經青冰查證，誠哥仍然緊握4.99%。據去年8月17日的批股通告，誠哥係接咗3,122萬股，翻查CCASS數字，滙豐金融證券在當日買入了3,122萬股，換言之誠哥啲貨係擺喺度的，截至11月26日的數據，這些股仍然紋風不動。
既然誠哥仍然持有，咁派特別息梗係有份袋啦，如果真係派50億特別息，即每股8蚊，咁誠哥就會收到2.5億元。李嘉誠基金會的應急錢計劃，已經去到第三期，合共動用了9億去支援零售、飲食及旅遊業，誠哥將國家派的特別息，借花敬佛轉贈市民，而部份市民又將錢轉贈守護孩子等機構，你話特別息係唔係變得既有趣又淒美呢。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com