武漢冠狀肺炎疫情持續嚴重，香港的口罩斷市、被炒、限購、假貨二手貨、全球瘋狂掃貨、再斷、再炒。新
春期間好多連鎖超市缺貨，尚餘少量口罩發售的藥房大排長龍，百佳網站曾一度有逾11萬人輪候購買口罩。事態的嚴重程度，明顯比零三年沙士更甚。
陳肇始做反面教材唔戴口罩，不但不鼓勵市民戴口罩，反而死撐話唔阻止市民戴口罩，到林鄭出嚟開記招，「一戴一露」戴錯口罩兼亂吹一通之後，政府人又唔截，關又唔封，物資又唔夠，令大家再次深明同一個道理，連口罩咁少事都解決唔到，唔怪之得今日香港會搞成咁。香港人，與其等人接濟，倒不如自救，求人不如靠自己。
當初如果唔係政府掉以輕心，準備不足，避重就輕，讓疫症蔓延，現時人心惶惶，又點會全城口罩斷市，搞到過年街都唔敢出？甚至連政府自己都不知所措，有官員去問返商界求助，到底去邊度入口罩……又點會有地產商如新世界帶頭捐錢送口罩？點會要靠一田、HKTV Mall死都死返啲貨，與市民齊心抗疫？
連屈臣氏都打響旗號話「陪你打好呢場仗」，從世界各地搜羅合規格口罩同消毒洗手液等抗疫產品，空運送抵。但聽講噚日全線230間分店暫時只能提供每間約20盒口罩，排長龍擔櫈仔都冇用，大家唯有一天一天的耐心等候下一批貨再返啦。口罩斷貨，卻帶旺了其他清潔健康用品的需求，如洗手液、濕紙巾、康鈣C、漂白水等都一掃而空。
香港人一向最多計，全世界但凡有口罩賣及生產嘅地方，由日本、韓國、美國、英國、法國，再去到東南亞如泰國等地，香港人都去勻曬，又托朋友，又網購。聽講近日連日本沖繩那霸市的超市都被掃光，撲口罩，不知成為幾多家庭今個新年的特備節目。
文迪晞
mailto:heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com