一早起身，見新增確診成萬幾宗，真係嚇到彈起！細心去睇，不外乎又係阿爺「搬龍門」，將有武漢肺炎病徵的都計落確診，
而唔係只靠病毒測試的數據去計數。搞咗大半個月先改遊戲規則，無非是先穩定市場，等到A股連升8日，投資者信心回穩，先公佈個大數，減低市場潛在跌幅，呢個算盤暫時是打響了。
至於港股上到28000附近，一口氣反彈1,800點，非常接近黃金比率0.618反彈幅度，短線值博率顯著下降，加上周末又到，點都要唞唞，食糊減磅實屬指定動作。
近期漲勢淩厲，有戰友笑言，當人人還在撲口罩時，金融人已在撲股票，當「後肺炎時代」去炒！咁究竟揀咩板塊去買？走進歷史，參考2003年沙士後的板塊表現，最當災的消費、旅遊、酒店、餐飲業，疫情後都會出現「報復式反彈」，原因好簡單：屈喺屋企太耐，「放監」自然會湧曬出街消費，加上相關股受壓已久，短線自然會「井噴式」爆上。
至於點樣揀股，魏力較傾向買龍頭體育用品股，一來本身高增長、底子厚，應該捱得過；二來今年有奧運大主題，可成炒作催化劑；三來疫症提升國民健康意識，運動keep fit提升免疫力，符合國策大方向。
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.entertainment.appledaily.com