近排中央要中港股走勢舞高弄低，果真容易。習主席要求盡量唔畀疫情影響經濟，大企業隨即表示加快復工（實情係未見大幅度
真復工），股市就反彈，然後湖北省用個新統計方式令單日確診人數過萬，當堂打窒美股升勢嘅利好因素，港股先升後跌。搬龍門玩法睇怕唔會咁快收手，消息市嘅人血饅頭應該點都食到3月底之前，升得高就會派貨，然後打中港股落去低位吸貨。如果你之前去到疫情恐慌之際掟貨，近排諗住疫情對股市影響漸成過去，見市況回穩再買返貨，你就係提供人血饅頭嗰一位了。
舊一浸疫情受惠股炒爆了，由中國醫療（8225）去到港視（1137），疫情受惠由前者當初一枝獨秀令資金焗買，3日搶高33倍，然後炒到網購，由於受惠股供應越嚟越多，分薄資金，加上疫情一日比一日接近高峯，炒高誘因亦慢慢減低，港視之類難再抱期望。與此同時，受累股亦會一浪比一浪強返啲，喺疫情高峯前相信已正常化。
物管股拗腰破頂屬其中一個最強板塊，雅生活（3319）9日RSI升到80左右，調整隨時上演，後市要睇仲有冇人配股減持，但即使疫情舞高弄低，似乎強勢物管股不容易改變大漲小回格局，候低吸仍有得博。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com