這段時間，餐廳食肆生意首當其衝，香港人如非必要，都寧願留在家中。
自己煮，煮得多都會厭同懶惰，唯有叫外賣。Deliveroo就剛推出
咗一個救市行動，由本月16日把6,000間餐廳夥伴降低5%傭金率一個月，相等於獲得15-20%的傭金折扣援助。同時，又為其逾六成半的獨家夥伴提供四星期「延遲付款計劃」，幫助減低流動資金不足的壓力。外賣送餐同餐廳經營一直維持住「唇寒齒亡」的微妙關係，當其中一方有難，另外一方固然要奮力相助。再加上一眾外賣送餐App生意由反送中至最近疫情肆虐推至高峯，更加應該出錢出力救救餐廳食肆，齊心抵抗逆境。
疫情持續越久，大家心情越煩躁，有時都想要食嚇啲「奢侈品」，安慰一下自己和屋企人。尤其是當你想足不出戶，又可以嘆到那些高級食肆和酒店的佳餚美饌，現時就連一些平時不送外賣的店舖都紛紛回應訴求，推出米芝蓮外賣熱線。就如米芝蓮三星的富臨飯店，除了鮑魚，亦有精美點心任你點，無遠弗屆，仲免收送貨費，的確唔錯。
最近，尖沙咀K11 Musea亦推出會員100蚊飲食券及專益返工族的食肆半價抗疫優惠，每用100蚊，只要show電話QR code，就可以減免50蚊。好明顯，商場生意唔易做，新地、新世界、太古都相繼減租，恒地的零售、教育、飲食租戶二月減租高達六成，海港城亦宣佈減租五成。現時商場的確靜得恐怖，不但冇曬大陸客，連本地客都見唔到；如果你去過其他地區場如九龍灣Megabox，除咗超市仲叫做有些人流，其他店舖的情況，要比近日成為行山熱點的城門水塘更加少人，開舖仲差過唔開，真係叫人慘不忍睹。
文迪晞
mailto:heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com