【智取大市】中芯要贏 侵侵要輸 - 晉佳
中芯計劃上A股科創板，股價一度大升。國情之下，中芯有能力盡搶大陸low end定單，已足夠大翻身。 互聯網圖片
中芯（981）計劃上A股科創板，股價一度大升，但要令真正翻身，就唔係靠返A股咁簡單。
中芯向來靠補貼、低息貸款度日，曾經一段時間要高通
硬食生意先有收入。經過多年唔爭氣之後，轉捩點係台積電前猛將梁孟松喺17年10月加盟，及後中芯嘅技術同管理突飛猛進，舊年尾正式有14納米製程量產。過往中芯相對台積電同三星，產品落後至少3、4年。800億市值嘅中芯同萬幾億市值嘅台積電一比，台積電一年資本開支千億已經係中芯5倍，科創板籌嗰百幾億對中芯嚟講只係杯水車薪。
如果喺一條公平嘅賽道之上，中芯當然不可能接近台積電，但只要不至於落後幾條街，國情之下，有能力盡搶大陸low end定單，已足夠大翻身。
要做到7奈米或以下製程，正階段需要引入荷蘭AMSL嘅EUV（極紫外光）光刻機。中芯之前向ASML預訂EUV光刻機，就俾美國攔住。荷蘭向來親美，為免得失美國，於是中芯定單泡湯。中芯喺冇EUV光刻機之下開發N+1、N+2，以N+1效能計，據講只係去到10納米製程。對中芯嚟講，最關鍵其實係政治因素。特朗普連任與否，對中芯能否引入EUR光刻機就相當關鍵。中芯要贏，至少侵侵要輸。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com