【利字當頭】一頻兩制優勢 - 利世民
最近有唔少人話手機上網又窒又成日斷，陰謀論推斷係電訊商特登拖慢4G逼人上5G。 資料圖片
最近有唔少朋友同我投訴，話手機明明收到訊號，但上網又窒又成日斷；當然亦有人講到去陰謀論。「唔使諗咁多，我都幾肯定咁講，係同各大電訊商推出5G有關。」
「特登拖
慢4G逼人上5G？」有讀者問。「唔係嘅，但頻譜係有限資源，有部份撥咗去畀5G用，4G就自然少咗。不過，多數電訊商初期都會睇住個情況，又唔會一次過將4G頻譜撥畀5G。呢種叫re-farming嘅操作，以前都發生過。由2G上3G，3G上4G，都有。」
唔同G嘅制式，點解唔可以「一頻兩制」？係喎，唔通人類總要犯同樣錯誤？工程師唔通就冇諗過呢個問題？上網搵下資料，發覺其實5G設備供應商，原來都有兩個門派。
一派就係華為，主要係設計畀啲準備大躍進上5G嘅市場。另一派，就係愛立信，設計裏面有個技術叫DSS，容許同一段頻譜可以4G同5G並存；呢個做法嘅好處係，開始推出嘅時候，短時間5G可以有比較闊嘅覆蓋，由4G切換到5G亦都交接順暢。
理論上，一頻兩制比較切合香港嘅實際情況，尤其是本來已經用緊4G觀望緊嘅消費者，唔會話因此受影響。不過，3、CSL同中電信都寧願用華為，博一博大躍進上5G，得數碼通就揀咗愛立信。
好彩，資本主義市場仲有選擇。經濟學，講到尾就係講資源分配極大化（Optimization）；點樣嘅制度，可以畀最多人可以得到最大效益。有得揀，大家都贏，就係咁簡單。
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com