收市閒情 - 千頌C 2020年8月26日
【收市閒情】「殼王」拍檔破產了（千頌C）
「殼王」陳國強（圖中）以往身邊紅人葉家海（Allan Yap）月初高院判破產。
正所謂沒有比較，就沒有傷害。TVB（511）股價早於上星期五，已被港視（1137）超越，就算今日港視高位回吐，股價仍然高過大台，市值仍然一個double，達83億元。
TVB嘅沒落，可以由「殼王」陳國強2015年正式「坐正」數起。陳入主前，即係2014年，全年收入近58億元，賺14億元，每股盈利3.22元；睇返2019年條數，唔好話賺，蝕少啲都已經偷笑，全年蝕近3億，每股蝕0.67元。50年基業，只需要4年時間，就近乎毀於一旦，其實，個厲害程度，我會比喻為——僅次於林鄭。
「殼王」退休，以往身邊紅人，雖唔敢講話樹倒猢猻散，不過似乎陸續運滯。繼劉高原6月被迫辭任南岸集團（577）主席後，噚日一份通告，令中環人又邊食花生邊八卦。
話說凱華集團（275）公佈，話葉家海因為喺8月3日，被高院判破產，所以按公司章程必須離職，冇得做董事，簡單講，即係破產兼失業！
葉家海（Allan Yap）呢個名，如果你Google佢，大家畀佢個朵有以下，包括「陳國強嘅親密戰友」、「陳國強拍檔」、「低調富豪」。佢以往嘅工作，就係同陳國強密密「合作」做刁，好似今次出通告嘅凱華，前身係錦興，隻殼亦係葉家海由陳國強手上買返嚟；佢哋仲friend到，曾幫陳國強做TVB替代董事。
好啦，喺金融界一個做大刁食大茶飯嘅人，你唔好話佢夜夜笙歌、酒色財氣、有幾頭住家啦，你話佢生活過得好樸實，都好難令人信服。想當日，冼國林飛去濟州島出席金利豐（1031）朱太60大壽，之後染上惡菌要切除左眼，去程坐嗰架私人飛機，正正就係葉家海擁有。我曾經都同佢有過一面之緣，可以話係豪飲豪食嘅大豪客。
好啦，問題就喺度嘞！一個做開刁億億聲嘅大莊家，平時去個旅行都係坐私人飛機。呢類人一般對貧窮定義係點？有個曾經叱吒風雲嘅莊家，就同我朋友咁樣呻過：「唉…呢期好窮呀…得返幾千萬身家。」係好誇，但貧窮真會限制想像。
係嘅，葉家海上年已經財困，江湖傳聞佢5至6年前，發好多債券畀大陸人，等佢哋投資移民香港，到呢幾年債券開始到期但又冇錢還；上年年底，又俾華融資產（2799）入稟高院追數1億元。
不過，理論上呢班人，就算財困極，爛船都有三斤釘，點會窮途末路到要搞破產呢個地步？須知道，破產係要捱，就算自住層樓都要賣、唔可以買貴嘢、非必要連的士都唔可以坐，如果去酒店豪食5,000蚊，仲分分鐘俾人篤灰。唔好講去旅行，飛都未必畀你飛，私人飛機？拎咗去還債啦。普通凡人都未必過到個心理關口，更何況佢係同開陳國強出出入入嘅戰友喎！同N過女星傳過緋聞嗰個陳國強喎！
金融圈千絲萬縷，一個出事，好多時表示，佢背後條產業鏈都出大事。今日表面爆嘅係葉家海，實際背後仲有幾多人爆煲？相信過多一排我哋就會知答案。
by千頌C@堆填區
http://fb.com/winbigwok
-----------------------------
【全球樓行】 Dream House零距離
屬於香港人的移民攻略
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS / Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！
收市閒情 - 千頌C 舊文
來源 source: http://hk.appledaily.com