【KingSir傾樓】新盤柏傲莊 抽定唔抽？（葉景強）
【KingSir傾樓】新盤柏傲莊 抽定唔抽？（葉景強）
其實個盤好唔好最緊要係睇發展商開咩價，開萬五蚊一定好，開兩萬五蚊就唔係咁好。更多
今個星期樓市最熱門嘅話題，相信必定係大圍新盤柏傲莊抽唔抽得過。
發展商首天開放示範單位，排
隊人龍差不多成千人，高峰期仲要等成8個鐘，好似買樓唔使錢咁，認真誇張！作為投資者嘅我，買新樓不嬲都唔會去睇示範單位，只會睇係邊個發展商同開咩價，不過今次有好友邀請由發展商帶路行「特別通道」，唔使排隊就去趁趁熱鬧，了解下點解啲買家對個盤咁瘋狂。
一蒲入內，夾道滿佈花花草草，加上重重機關，感覺猶如置身於迪士尼的迷離莊園。再行前點看看示範單位，發覺內裏沒有金雕玉砌的設計，卻只有三個交樓標準的清水房，選材及設計方面不似一般新盤，即雲石、雲石以及雲石嘅豪氣，換來的卻是帶點歐陸簡約風味的設計，相信年輕中產尤其留過學的會比較喜歡。
好唔好最緊要睇價
好多人問我呢個盤好唔好、抽唔抽得過？其實個盤嘅優勢唔使我多講，兩鐵（東鐵線及屯馬線）滙聚，未來唔使轉車可直達港島區，加埋樓盤基座有個比觀塘apm大近10%嘅商場，生活配套非常完善。但其實個盤好唔好最緊要係睇發展商開咩價，開萬五蚊一定好，開兩萬五蚊就唔係咁好，最終首張價單折實平均呎價18,921元，入場費最低628.9萬元。
仔細去睇首張價單，發覺呎數越細呎價越貴，例如第2座最低層8樓E室一房322呎，減完20%折扣後，入場價628.9萬元，呎價19,533元；高層39樓E室，呎價為22,236元。兩房483呎最低入場價852.4萬元，呎價17,648元，40樓呎價為20,190元。三房663呎最低入場價為1,180萬，呎價16,713元，39樓呎價為19,505元。同一層數，一房同三房呎價相差14%至16%，而第一期二及三座的一二三房比例為30、30、40。
再比較同區兩個大型屋苑名城及溱岸8號，有10年樓齡主打3至4房大戶型、提供4,264個單位嘅名城，平均呎價1.6萬元，而一站之隔的溱8，樓齡8年，主打2至3房提供981個單位，平均呎價1.85萬元。比較後，你會發覺柏傲莊首張價單開價真係唔算貴。
至於應該買1房2房定3房，那就睇你買層樓嚟做乜，如果自住的話，Budget鬆動就梗係買3房啦，如果首期冇咁多，可以考慮買533呎2房，樓價1,000萬元以下有交易，可以做到8成按保，200萬首期就夠。但如果係投資的話，買1房就比較好，你話又要新樓、又要大型屋苑、重要配套完善的話，區內供應真係唔多，名城同溱8嘅供應直頭係零。
不過筆者對新盤嘅命名，暫時都唔係太習慣，雖然話整個樓盤構思像一個農莊，但中國人對乜莊物莊感覺始終唔係咁接受，又或者係筆者比較老餅跟唔到潮流啩，哈哈！
葉景強（King Sir）
本欄隔周二刊出
異動尋寶 - 魏力 舊文
來源 source: http://hk.finance.yahoo.com