橫琴夢破滅？
幾年前，橫琴與澳門實行24小時通關，當時澳門賭場客似雲來，政府年年派錢，樓價升至一萬蚊人仔一呎左右。當時橫琴作為新經濟特區，呎價只是二千頭，於是大量澳門人衝入橫琴掃樓，三、五年間呎價升至5,000蚊人仔，有香港投資者吃過深圳前海的甜頭，於這價位追入，目標價是一萬蚊一呎
。當時我與一班投資者到橫琴考察，展廳人頭湧湧，有人即時落訂，氣氛熾熱，三年過後，達標了嗎？扣除通賬，好似冇乜鬱過。
大灣區概念宣傳得最出力，要數兩至三年前，最多人問是中山、惠州，本人一早斷定兩市為「投資伏位」，自用喜歡就買，唔使問我，就算近年被中介攻擊，為了講真話，亦食得鹹魚抵得渴。至於橫琴，當日小弟認為短期內已升過龍，而且早已實施限購，相對樓宇供應量大。一個經濟特區要發展成熟，就算受惠政策及過去中國的高速發展，深圳亦需要三十年才成形，如以居住新區概念，亦需十至二十年。投資橫琴的朋友通常是買個「夢想」，中介所講的前景，三年過去，物業落成不少，但學校醫院商場娛樂食店等生活配備嚴重不足，導致極少人在地居住，商業大樓空置率高，整個區域人氣欠奉。
前海靠近深圳、香港，前者走創科，後者走金融，而橫琴靠近珠海、澳門，前者難與深圳比，後者全民靠賭，就算行一國兩制，也不是話轉型就轉到。即使樂觀認為橫琴一定掂㗎喇，也要很長時間，我以前都話與其投資橫琴，不如投資拱北、吉大等市中心物業，若然橫琴掂，亦會連帶受惠，進可攻退可守。
作者為《HEA富學》作者，Finsight ED founder
www.finsight-ed.com
https://www.facebook.com/heaology.edu
HEA富專欄 - 郭釗 舊文
來源 source: http://www.am730.com.hk