沒有安居，更加要思危
在中原指數節節上升，新鴻基地產以約86億元，超估價上限44%，投得古洞住宅地皮，仍然有評論員認為樓市有危機，隨時會大冧，叫大家居安思危。一般人認為這句說話出自好心，沒有甚麼不妥，但我認為唔妥到極，因為現在買樓的人大多數是初次置業，未有樓又點可以講居安。而事實上現
在他們未安居，更加要思危，所以才買樓，否則樓價繼續上升，他們就要一世租樓住，一世替人供樓。
一向以來，我提醒打算買樓人士，買樓是私人決定，在成交之前千祈唔好同人講，否則一定會俾人嚇到唔敢買，甚至會撻訂。那些人唔使多講，一句居安思危就夠，樓市有甚麼危險，可以講多到數唔哂，有人話利息低無可低，美國稍為加息，供樓的人就會供到氣咳；亦有人話有很多香港人用BNO移民去英國，二手樓供應會大幅增加，這算唔算是樓市危機，當然算。不過，美國加息，受傷最重的應該是美國，所以，會不會是一個問號，幾時加息是另外一個問號，雖然有很多人用BNO移民去英國，令到二手樓的供應增加，但亦有很多從內地移居香港，需求可能比供應仲要多，樓價不跌反升。所以，打算買樓的人不但要思危，仲要考慮危險會不會出現，否則就不是思危。
作者為紀惠集團行政總裁
文章轉載自「AM地產」facebook:
http://bit.ly/2wls4EF
湯文亮專欄 - 湯文亮 舊文
來源 source: http://www.am730.com.hk