操盤手劄記│年尾執倉有路捉（割柑人）
操盤手劄記│年尾執倉有路捉（割柑人）
港股上周反彈，出現「陀螺」形態，喺持續下跌後出現呢個好淡爭持形態，反映低位買盤開始湧現，本周有望繼續反彈。
呢兩年嚟，無論股市升跌，市場都會搬出一個原因——疫情。每當升市，就係疫情受控，恐慌紓緩；每當跌市
，就係疫情反彈，恐慌加劇。由上年3月疫情高峰期，到疫苗研發、接種，再到英國、南非、巴西、印度先後發現變種病毒Alpha、Beta、Gamma、Delta⋯⋯再到上月非洲南部波劄那發現變種病毒Omicron，升市跌市解釋，疫情都係萬能key！然而，係咪真係關事？定係懶得再搵原因？
美股、外匯、加密貨幣免費即時報價，自選投資組合獲取相關新聞提示。
以Omicron為例，喺疫情重災區南非，超過80%病例感染Omicron，但喺傳染個案創新高時，死亡率則創新低。Omicron係跌市主因抑或市場噪音，你話呢？月中未到聖誕，唔少美股投資者已離場，據報原因就係「Omicron is coming to town」，同聯儲局放鷹。富瑞資金流報告顯示，截至上周三（22日）止一周，環球股票基金走資400億美元，結束連續12周淨流入，當中，美股基金走資最多，佔近97%。
港股今年來 淪全球最差
中港股票基金又點？反而吸資！期內，港股互惠基金同ETF吸資22.6億元，係連續第34周錄得淨流入，累計吸資449.3億元；中資股互惠基金同ETF更吸資340.9億元，係連續第2周錄得淨流入，而且比前一周嘅156.8億元加快流入，累計吸資497.9億元，數據反映國際資金部署。此外，北水亦持續流入港股，截至平安夜（上周五）半日市，已連續第23日錄得淨流入，累計流入577.2億元。
技術走勢上，港股上周反彈，出現「陀螺」形態，喺持續下跌後出現呢個好淡爭持形態，反映低位買盤開始湧現，本周有望繼續反彈；不過，年尾聖誕新年接踵而來，上周成交明顯縮減，或會影響本周反彈空間。雖然港股今年以嚟累計跌近一成半，喺環球主要股市中墊底，但睇cashflow、睇trend，明年初可較為樂觀，不妨著手為明年股票投資執倉。
騰訊派京東 超人放飛機
上周港股最juicy嘅新聞，莫過於「騰訊派京東」同「超人放飛機」，對執倉都有啟示。上周四，騰訊（700）公布向股東分派京東（9618）實股作中期息。上市公司派發子公司股份唔奇，派發其他上市公司股份就相當新穎。騰訊過往分派閱文（772）、騰訊音樂（TME）都係屬於附屬分拆上市，今趟分派所投資嘅京東可算首例。京東當日急跌7.02%，翌日回升0.62%，反彈乏力，皆因沽壓未除。中央結算中介持倉紀錄顯示，上周四京東美股ADS託管行德銀持倉大減2,300萬股，涉資約60億港元，京東當日成交約56億港元，就算全部沽盤嚟自德銀都唔夠數，實際亦無可能，估計係美資股東先將持倉由德銀調倉至其券商再伺機沽貨。另外，騰訊股東亦會提前沽空鎖定利潤，加上炒家投機沽盤，京東短線沽壓重重。
騰訊喺2014年起投資京東，無獨有偶，李嘉誠亦喺2014年起投資飛機租賃，更無獨有偶，係兩pair都喺上周結束7年情。上周五，長實（1113）公布聯同李嘉誠基金會，以332億元放售飛機租賃業務予凱雷，涉及125架飛機；都係嗰句，歸咎疫情。今次單deal係長實繼2017年以402億元放售中環中心後最大嘅deal。李嘉誠向以買賣時機拿捏準繩見稱，鮮有出錯。睇完上周呢兩單新聞，大家檢視一下自己個倉，若有「被分手」相關股票，要執一執了。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com