操盤手劄記│牛市三寶的啟示（割柑人）
操盤手劄記│牛市三寶的啟示（割柑人）
綜合10間券商對恒指今年預測，睇22000至28600，普遍預期今年好過舊年。
今日係2022年港股首個交易日，到底會掛「紅盤」定「熊盤」呢？先嚟溫故知新，上周五除夕，恒指升1.2%，全年則跌14.1%「熊霸
全球」。藍籌股中，全年表現最好三甲係李寧（2331）、舜宇（2382）、中石油（857），分別升60.1%、45.3%、44.6%；最差係阿里健康（241）、海底撈（6862）、阿里巴巴（9988），分別跌71.2%、70.5%、48.9%。阿里巴巴除夕反彈8.2%稱冠藍籌，可謂「輸家食尾糊」，但在美股價先行回吐，較在港股價低2.6%，或會拖港股後腿。
美股、外匯、加密貨幣免費即時報價，自選投資組合獲取相關新聞提示。
大行點睇港股？綜合10間券商對恒指今年預測，睇22000至28600，普遍預期今年好過舊年，皆因現已跌至低殘，再跌空間有限。恒指跌穿2020年3月「肺疫底」（疫情高峰，低見21139）機會較低。恒指2021年埋單收報23397，市盈率10.7倍，市帳率1.09倍，估值落後於歷史平均值，具估值修復空間。相對美股，標指市盈率26.51倍，市帳率4.84倍，港股亦具值博率。
騰訊友邦碧服 最多券商推介
大行有乜推介？綜合10間券商今年首選股名單，最多券商推介嘅係騰訊（700）、友邦（1299）、碧桂園服務（6098），各有5間揀選。推介騰訊嘅有中金、建銀、滙豐、瑞銀、星展，分別睇549元、566元、590元、600元、671元，該股現價456.8元。推介友邦嘅有瑞銀、花旗、中金、星展、大摩，分別睇110元、116元、120元、125元、130元，該股現價78.6元。推介碧服嘅有滙豐、星展、中金、交銀、招銀，分別睇68.7元、75.61元、76元、80.57元、91.2元，該股現價46.7元。
券商揀選騰訊，原因不外乎喺監管陰霾下，騰訊情況比同行好；而且，其金融科技同商業服務增長快速。揀選友邦，則係預期美國展開加息周期，銀行股同保險股都會受惠；另外，友邦中國業務NBV（新業務價值）增長可望加速。揀選碧服，就係預期內房最艱難時刻已過，物業管理股中，碧服持淨現金，財務穩健；此外，物管股估值低，風險收益率高。
新舊經濟交替 新賽道元宇宙
講到騰訊，其實不無唏噓，舊年跌近兩成。記得2017年牛市，喺騰訊帶領下，恒指全年升36%，騰訊全年升1.16倍，獨力貢獻恒指近三成升幅，今年會否重演好戲呢？講開又講，2017年「牛市三寶」係騰訊、平保（2318）、港交所（388），平保現價只得當年高位七折，慘！不過，比起2007年「牛市三寶」滙豐控股（005）、中移動（941）、中石油，當年分別高見150元、160元、20元水平，有排返唔到家鄉，仲慘！
兩次牛市嘅「牛市三寶」，正係新舊經濟交替嘅寫照，騰訊取代滙豐成為股王已十幾年，要保住寶座，就要走喺新經濟最前線。互聯網新經濟嘅新賽道係元宇宙（Metaverse），勢將成為下一代社交媒體同遊戲平台。騰訊喺呢兩方面都係龍頭，可望成為首批同元宇宙概念接軌嘅企業。科技股中，筆者同券商睇法相近，都係以騰訊為首選。
新年伊始，祝各位讀者旗開得勝！
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com