笑到最後｜高科技股鐘擺後下個趨勢（高明）
笑到最後｜高科技股鐘擺後下個趨勢（高明）
超高科技嘅下一個趨勢，就係最原始求生資源。
玄學有講2024年世界由八運轉九運，最粗略嘅講法係之後九運嘅二十年時勢會變咗。高明唔係玄學家，所以無謂喺玄學上打轉。
美股、外匯、加密貨幣免費即時報價，自選投資
組合獲取相關新聞提示。
但係時勢嘅轉變，有留意股市嘅人都會見到，股價雖然一方面反應人性，但另一方面都係反映緊股價背後嘅生意以及其商業周期，所以只係睇通圖表，就好似識功夫但冇練體能一樣；只係識商業智識，又會被變幻無常嘅股價搞到精神分裂。股市嘅軟智識同硬智識，就好似玄學中嘅陰陽一樣，要配合。
最原始求生資源
唔需要識八運九運，睇個股市就知道， 一個周期推到極端，跳落下一個周期，竟然係推去另一個極端。實際嘅例子就係：2020年疫情確認之後，掀起在家工作狂潮，軟件股被喪炒，同大部份物實產品唔同， 軟件股係無限複製，曾幾何時有翻版問題，商業模式嘅發展下，現時普遍採取月租形式嘅訂閱制度，只要你開發一個適合當時使用嘅軟件，例如Zoom（ZM），擺個壇出嚟，每多一個人用，就係淨賺，當然之後一樣會有持續研發同埋伺服器嘅成本上升，但係總體來講，邊際成本接近零。
正當去到2021年年底， Meta(FB) 宣布進軍元宇宙，比起訂閱制軟件估更勁，元宇宙就係第二人生，先唔好講點解去到元宇宙仲要返工，呢件事係將另一個現實推得更遠，如果由嗰一刻起持續發展的話，人類可能只要滿足基本生理需要，走入元宇宙就可以解決基本以上嘅所有需要。
但係正如八運轉九運一樣，時局並唔係一條單程路，鐘擺效應反而令到世界出現U-turn。 首先打破呢件事嘅係聯儲局，加息憧憬令到加密貨幣以及相關股份回落。但係都未影響到件事，真正影響嚟自通脹，普遍物價上升，其實唔係，升幅集中喺最源頭嘅資源上，包括石油及食物。 歐美國家曾經出現短暫嘅入油危機以及超市食物短缺， 搶購商品以求生，大家就知道乜嘢先係權力來源。隨後烏克蘭遭到俄羅斯入侵，以及香港近期嘅小風波，睇超市貨架更加知道邊個靠邊個。
上期講到美國總統拜登壓唔到場，一周過後，好多其他國家及企業一齊幫手，先勉強穩住局面，未致於信心危機。但就算過得呢關，全球輪流爭咪局面已成，唔需要識紫微鬥數或者哈佛MBA理論，簡單一睇已知呢個趨勢會持續，超高科技嘅下一個趨勢，就係最原始求生資源，呢個趨勢相提醒大家，相對生命、健康、自由、幸福、家庭，股價嘅變動原來排咁後。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com