操盤手劄記│北水追息 掃中海油（割柑人）
操盤手劄記│北水追息 掃中海油（割柑人）
中海油上周五重上12元，見兩年多高位。
通脹見頂回落？被美國聯儲局視為通脹指標，剔除食品同能源價格後嘅核心個人消費支出（PCE），上周五出爐數據顯示，4月按年升4.9%，符合預期。核心PCE喺2月按
年升5.3%，見39年高位，之後連續兩個月放緩。市場憧憬通脹受控、加息放慢，美滙指數跌至101.64，美國10年期債息跌至2.743厘，美股道指、標指、納指分別升1.8%、2.5%、3.3%；港股ADR比例指數高水92點或0.4%。
美股、外匯、加密貨幣免費即時報價，自選投資組合獲取相關新聞提示。
不過，美國4月個人收入按月只增0.4%，低過預期，亦係連續兩個月放緩，如果計入通脹影響，可支配收入持平；而美國4月個人支出按月增0.9%，雖然低過3月嘅1.1%，但仍高過預期。薪金增幅追唔上物價升幅，消費者正在動用儲蓄嚟消費，美國4月儲蓄率跌至4.4%，為近14年低位。通脹損害消費信心，美國密歇根大學5月消費者信心指數終值跌至58.4，為近11年低位。
港股升越降軌 受制50天線
香港又點？上周一，統計處公布，4月消費物價指數（CPI）按年升1.3%，比3月嘅1.7%低，亦低過預期。上周三，薪酬趨勢調查委員會確認調查結果，公務員加薪淨指標為2.04%至7.26%，香港總商會隨即批評脫離現實。現實係點？疫情爆發近兩年半，2020年僱員平均加薪幅度為1.4%，2021年為1%，跑輸通脹；今年喺第五波疫情下，唔少公司無法營業，打工仔莫講話加薪，保得住份工已偷笑！
講返港股，上周五期指結算前夕，恒指喺阿里巴巴（9988）季績好過預期帶動下，裂口高開兼突破2月17日延伸嘅降軌，收升2.9%，報20697，受制50天線。恒指本月亦曾突破降軌，但未能企穩3日；而2月21日後，亦未上過50天線。技術上，恒指守住降軌（現處20500），若重上50天線（現處20852），可望上試本月初假突破時高位21300水平，然後係上月初高位22500水平，亦即今輪下跌起點。
綠債有包底息 藍籌中亦有
筆者上周一提到，政府綠色債券（4252）破底冇有怕，長揸冇得輸，若債價跌至99.5元，以包底息2.5厘計，總回報達3厘；若跌至99元，總回報達3.5厘。當日果然低見99.5元，之後連升4日，上周五收100元，重上發行價。雖然綠債息率同本地通脹掛鈎，而4月CPI為1.3%，但有包底息，仍可穩收2.5厘，跑贏通脹。如果債券唔係你杯茶，藍籌股中，亦有股份有包底息，如中海油（883）。
中海油上周五重上12元，見兩年多高位，一來關油價事；二來關派息事。集團4月28日宣布派特別股息1.18元，6月9日除淨，一個月嚟，北水持續流入，套取AH股股息差價兼減低交易成本，單計上周五就有近10億元淨流入。北水偷步掃貨，皆因中海油A股較H股溢價達八成，股價差距大，股息差距相應亦大。集團1月公布經營策略時，承諾2022至2024年度派息比率不低於40%，全年股息包底0.7元，現價以包底息計，來年H股息率最少亦有5.8厘，A股只有3.2厘，相差2.6厘。北水買盤，料將繼續成為中海油股價推手。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com