【平民投資教室】錢俊：內房債反彈 入市係時候?
平民投資教室
日期：2022-09-06
更新時間：13:20:37
內地房地產債券喺過去好幾年曾經係內地及香港散戶熱愛,皆因非常「出息」,年派十厘以上,聽落係幾吸引。但自從去年恆大危機喺上年9月拉開內房債危機後,內房債從此就好似柬埔寨一
樣予投資者生人物近嘅感覺。
點解以往內地房地產公司咁高息?實在同營運模式有關。內地發展商買地起樓,都係以貸款及發債形式籌錢。當樓花可以推出時就有錢回籠還債,再繼續發債重新嚟過。負債過多自然令公司信貸評級受影響,所發嘅債要俾好高息先有人有興趣買。好景不常,因著新冠疫情,不但疫情原固推遲交樓,經濟不景都令買樓嘅需求下降。加上內地之前想減少呢個高槓桿嘅借錢現象,推出所謂「三條紅線」政策,要求內房公司負債比率唔可以太高。發展商收唔返賣樓嘅錢同時,又唔俾發債cap水,自然面臨爆煲。
3001:香港第一隻高收益內房債
呢幾個月市場又開始吹風,內地會推出一系列措施確保物業可以交付買家。另外經濟低迷下,市場都預計人行會減息,利好樓市,同時對內房債帶嚟提振。以PREMIA 中國房地產美元債 ETF(HKG:3001)為例。年初至今雖然大跌51%,但過去一個月勁升28%,冠絕香港上市ETF。根據簡介,該ETF為香港第一隻高收益債ETF,高收益債佔比約75%,主要投資一籃子中國房地產美元債券,每家債券發行人集團權重上限為5%。十大持倉包括綠地控、雅居樂、平安地產、碧桂園等。管理費為0.58%。
以ETF或基金持有債券,比單買一兩隻債券好處係分散風險,就算一間公司債務違約,其他持倉或者無事。但今次內房債係行業問題出現骨牌效應,投資者亦恐慌性拋售,造成大跌甚至牽連整個投資市場同經濟。3001嘅平均到期收益率達50%,足見投資者係幾咁睇淡內房債。現階段是否已經見底可以搏反彈?錢俊認為前景仍然面臨挑戰。正如上一篇文所述,疫情清零政策一日仍在,經濟難有轉機,買樓意慾低迷,而且封城措施亦令建築時間延長。因此喺資金回籠困難方面未有改變。
再者,以往好多內房發展商想發債cap水,發咗好多美元計價嘅債券。要知道賣樓賺嘅錢係人民幣,但還錢就要用美金。現時美國正處於加息周期,美元價值亦因此拾級而上,變相人民幣貶值。亦即係表示你要用更多嘅人民幣兌美元先夠還錢。因而更加重內房公司還錢嘅負擔。
幾時跌完錢俊沒有水晶球。但現時投資內房債有如去馬會買廿蚊六合彩希望中頭獎一樣。錢俊亦都經常提醒,唔好聽到「高收益」呢隻marketing專有字就覺得係好嘢,其實佢哋係因為無人買先「賣大包」平賣嘅垃圾債。
想聽其他投資Topic?話我知:chinjun.column@gmail.com
FB: chinjun.etf
IG: chinjun.column
以上觀點僅為個人分析,並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com