笑到最後｜永遠都係「冇份贏，慘過輸」（高明）
笑到最後｜永遠都係「冇份贏，慘過輸」（高明）
人生中曾經因為資產升幅受惠，入咗坑，心理上必然係冇份贏慘過輸。
拉勻過去一個月，港股升20.8%，應該喺全球主要市場之中升得最多，相對同期納指升7.3%、標普升6.1%、道指升4.8%，而香港嘅
宿敵——新加坡——海峽時報指數同期升4.4%，香港終於贏返一仗，同好多香港球迷喜愛嘅曼聯一樣，終於連贏一個月，立即想當年三冠王朝魔性澎湃嘅感覺，都係人之常情。
美股外幣即時報價 多國新聞任睇
如果淨係睇一年表現，港股相對美股等都幾好，所謂股票淨係睇未來，無需要再深究港股之前三、五、十年回報，嗰啲當粉筆字抹咗佢，淨係諗現時氣勢如虹已足夠，正能量去諗，納指都未返萬六，港股已準備破兩萬點，美國人瞓覺嘅時候，香港人努力工作，所以先有香港奇蹟。
點叫買齊貨 各有定義
當然，現實嘅問題就係：齊貨未？任何人投身股票市場，都應該喺唔同市況反問自己，有冇買齊貨。齊貨嘅定義，喺大家嘅心中，以前識一啲朋友，開十個戶口，每個戶口放十皮，然後全部篤十倍，先覺得齊貨；亦識人做莊家，本業係印股票，炒股票齊貨定義係幾萬蚊買ETF。總之係一個數，令你自己感覺出面個個講炒股，你都有份享受嘅銀碼，而唔會畀人講兩句，轉頭高位衝。
假設2023年係大牛市，恒指將會升上五萬點，成個過程中最大障礙，就係網台、社交媒體、親朋戚友、餐廳隔離枱開咗枝酒兩皮嘢嘅對話內容等等。炒股本來係一件好個人嘅事，但係股市可怕嘅地方係，你只係付出金錢及決定，睇啱股價升咗後，就覺得自己乜都識，持貨者大腦異常興奮，對內當然好High，對外就係周圍同人講，股市一旺，個個都講股票，就係咁解。
「我今朝㩒兩個掣又賺兩球」，市旺最常聽就係呢一類說話，應對唯一辦法係「唔聽唔睇唔信」，但係資訊爆炸再加正常生活會出街，點都會睇到少少。正如樓上所講，炒股係好個人嘅事，同一隻股票，啱阿堅未必啱阿強，又或幾時上落車人人唔同，呢類說話會打亂原有部署，最常見係高衝，更壞情況係沽咗準備爆升嘅股份，換曬強弩之末股。
一個正常唔係住深山冇網上嘅人，唯一應對方法就係齊貨，有一個基本浴缸迎接黃金雨，然後再因應邊度落雨去邊度。
未入坑當然唔會Feel到，但係只要人生中曾經因為資產升幅受惠，入咗坑，心理上必然係冇份贏慘過輸，今年年底，點都要齊貨，即使明年結果係不如預期。
至於恒指會唔會上五萬點。回顧十年美洲、亞太、歐洲全球較大嘅指數，竟然得香港係跌12.4%，香港嘅阿爺上證升58%，輩份再對上嘅莫斯科指數都升53.8%，美股十年倍倍聲升就大家都知，嗰啲咩雅加達、聖保羅都升六成至九成，所以，本欄一睇就知港股潛力無限啦。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com