恒指公司喺上年12月9日發布第二上市同雙重上市公司喺指數嘅新計法，令中概股成為今趟季檢贏家。
息魔又張爪！美國聯儲局最睇重嘅通脹指標——PCE（個人消費支出）物價指數，1月數據上周五出爐，出乎意料由放緩轉加快，按年升5.4%，高過預期嘅5%，前值上修至5.3%；按月亦升0.6%，高
過預期嘅0.5%，前值上修至0.2%。剔除能源同食品嘅核心PCE，按年升4.7%，高過預期嘅4.3%，前值上修至4.6%；按月亦升0.6%，高過預期嘅0.4%，前值上修至0.4%。數據反映通脹壓力未紓，強化儲局繼續加息理據。
美股外幣即時報價 多國新聞任睇
美國PCE數據向來較CPI（消費者物價指數）數據遲出爐，市場對當月通脹情況，大致已於CPI數據得知並作部署；不過，由於今年CPI權重改變，兩個通脹數據嘅關係要觀察1月情況。1月PCE通脹回升，皆因服務業通脹按年升幅進一步升至5.7%，雖然商品通脹繼續放緩至4.7%。數據一出，美滙指數應聲而上，高見105.32，收105.26，升0.6%；離岸人民幣低見6.9833兌1美元，創今年新低，收6.9801，跌0.9%。
利率峰值料起碼5.5厘
美國通脹升幅加快，但收入增幅低過預期，1月個人收入按月增0.6%，低過預期嘅1%；不過，個人支出按月增1.8%，由上年12月嘅跌0.1%強勢反彈，反映消費者支出今年開局表現強勁。通脹頑強、消費轉強，市場加大對儲局繼續加息嘅押注。利率期貨顯示，市場押注100%機會喺3月、5月、6月各起碼加息0.25厘，而3月、5月加息0.5厘機會達27%、29.3%；6月利率峰值將達5.5厘或以上。
美債孳息方面，對息口較敏感嘅2年期債息高見4.84厘，收4.8136厘，超越2007年中金融危機爆發以嚟嘅高位4.799厘；10年期債息回升，高見3.978厘，收3.947厘。美股道指、標指跌1%，納指跌1.7%；人民幣下跌，中概股受壓，金龍中國指數跌3.9%；港股ADR比例指數低水264點或1.3%，藍籌中槪科網股ATM，美國股價分別較香港低3%、2.1%、2.2%；夜期同俗稱「黑期」嘅新加坡HS50指數，都低水約300點或1.5%。
新能源車見低吸機會
港股上周五收20010，貼近250天牛熊線，期指同外圍指數已率先跌穿20000關。以恒指上年尾收19781計，今年以嚟嘅升幅蒸發殆盡。今日期指結算，或將下試19600水平，即上年10月尾低位至今年1月尾高位嘅升浪回調0.382倍。恒指近兩周沿保歷加通道底線走，開始形成橫向整固，預期中長線有較大反彈波幅，各板塊中，新能源車值博率較高，因2月至3月係汽車銷售淡季，造就低吸機會。
恒指公司季檢上周五出爐，恒指成分股維持不變；國指納入小鵬汽車（9868），剔走中國飛鶴（6186）；科指納入微博（9898），剔走明源雲（909），3月13日生效。值得注意嘅係，恒指公司喺上年12月9日發布第二上市同雙重上市公司喺指數嘅新計法，令中概股成為今趟季檢贏家，皆因舊計法只計在港註冊股份，新計法則計總發行股數，包括海外註冊股份，中概股喺指數嘅市值上升，權重相應上升。科指最多中概第二上市公司，當中理想汽車（2015）、小鵬汽車嘅權重，分別由2.94%、0.57%，升至6.26%、2.34%，成為大贏家。
割柑人
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com