【平民投資教室】錢俊：股市的貧富懸殊
平民投資教室
日期：2023-07-18
更新時間：10:16:49
美國通脹數字上周出爐，通脹明顯降溫，市場估加息已到尾聲，最多加多一次就收工。美股自然繼續火熱，已創一年高位，重返歷史高位指日可待。
今輪美股升幅之大同快頗為令各大投資者跌眼鏡。
畢竟經歷上年令人失望嘅表現，加上不斷加息，好多大行同經濟師都估經濟今年會出現衰退。然而至今仍然平穩。
以加息與否指標之一嘅就業情況嚟睇，儘管年初美企大規模裁員嘅新聞不斷，美國失業率喺過去 12 個月始終維持喺3.4%至3.7%水平，就業市場已經28個月連續增長。4 月失業率為 3.4%，更創下50年來新低。因為亦令人覺得美聯儲有更大空間作出加息以壓制通脹。
之但係依家代唔代表經濟就係一帆風順？錢俊唔係經濟師，難以一槌定音，但股市嚟講，就唔係間間公司都有好表現。數字顯示，上半年跑嬴大市標指嘅美股低過30%，係過去近40年最低嘅數字，亦即係話升市都係貧富懸殊。
另一個新聞係納斯達克100指數會喺今個月進行史上第三次特別調權，以化解少數重磅股佔納指100權重過高問題。以往指數已經每個季度重新調整，但由於近月多隻科技股升勢過急，5大權重股已佔指數權重近44%，若連同Meta及Google母公司Alphabet，7大科企已佔權重55%。
MTUM：高買追貨投資策略
股票愈貴愈多人買嘅情況出現，若果想乘勝追擊，有何玩法？喺投資世界中，有種策略叫「價格動量投資」（Momentum），簡單講就係揀選近期升幅較突出嘅股票嚟買，而忽略考慮公司財務狀況或市盈率等因素。係因子投資（Factor investing） 其中一種玩法。
iShares MSCI USA Momentum Factor ETF（US:MTUM）係美國上市最大嘅動量投資ETF，規模近90億美元。根據資料，基金會投資過去跑嬴大市嘅股票，以6 個月及12個月風險調整後價格動量為指標。管理費方面，雖然會較好多被動指數基金貴，達0.15%，但仍然比大部份ETF平，包括比追蹤納指100嘅QQQ嘅0.2%平。
雖然如此，基金表現強差人意。今年至今回報幾乎無錢賺，莫講同升36%嘅納指比較。其中原因可能係因為今年升市升得太急同快，納指過去6個月已升超過27%。去年跑嬴大市嘅股票主要為價值股，因此年初基金就曾剔除亞馬遜同蘋果等股票而加入銀行股，因此今輪升市佢或未換得切貨，依家就變成拖後腿嘅原因。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com