中港股民最關心嘅係人民幣滙價，畢竟中資股收入以人民幣為主。
又到估息時間！美國聯儲局本周議息，結果將於本港時間周四淩晨2時揭盅。此前出爐嘅經濟數據包括：上周三、四公布嘅8月CPI、8月PPI受到油價飆升刺激而高過預期，上周五公布嘅9月紐約製造業指數遠超預期（報1.9，預期為-10，8
月為-19）；不過，數據顯示核心通脹大致放緩。睇利率期貨，市場押注今次議息暫停加息機會為98%，但11月或12月再加息機會都有約三成。
美股外幣即時報價 多國新聞任睇
上周五，美股「四巫日」（指數期貨、期權；股票期貨、期權四期結算），撞正汽車工會罷工，加上9月密歇根大學消費者信心指數初值低過預期，利淡市場氣氛，三大指數跌0.8%至1.6%；港股ADR比例指數低水93點或0.5%。要注意係，期油連日企穩90美元之上，收91.2美元；10年期債息再度升穿4.3厘，收4.336厘；美滙指數連升9周，企穩105之上，收105.33。非美貨幣受壓，歐元連跌9周，收1.066；日圓再創10個月新低，收147.85兌1美元。
本月屢出手撐人民幣
中港股民最關心嘅係人民幣滙價，畢竟中資股收入以人民幣為主。上周四傍晚，人民銀行喺統計局公布經濟「三頭馬車」——消費、工業、投資數據前夕，宣布下調存款準備金率0.25個百分點，翌日生效。人行放水刺激經濟，人民幣離岸價先軟後揚，總算止住傍晚跌勢。降準喺市場預期之內，但宣布時間、生效時間則喺預期之外；往常係喺數據出爐後出手，約10日後實施。睇人行公告，除咗釋出穩經濟訊號，更提到穩滙率。
事實上，人行本月已多番出手撐人民幣滙價，包括：①月頭宣布9月15日起下調外滙存款準備金率2個百分點，以增加市場上美元供應，降低美元價格，令人民幣回升；②上周據報要求銀行不要立即平倉市場外滙頭寸，意味企業所購買嘅美元，部分將被銀行吸收並留喺帳簿上一段時間，以紓緩人民幣貶值壓力；③銀行又被告知，企業兌換5,000萬美元或以上需要人行審批。人民幣在岸價上周五收7.2749兌1美元，離岸價收7.2808。
另外，人行上周三更公布，本周二喺香港發行150億元人民幣6個月期央行票據，係一個月內第二次在港增發央票，更係2018年在港發行央票以嚟該期限最大規模。市場解讀人行透過發行離岸央票吸收離岸人民幣流動性，推高離岸人民幣息率，打擊空頭，並收窄境內外人民幣價差。此舉意義重大，顯示人行有意將發行央票變成離岸人民幣流動性管理工具，離岸人民幣嘅公開市場操作，引導離岸人民幣息率調整人民幣滙價。
降準放水利好內銀股
港股上周五衝高回落，升幅腰斬，收市只升134點或0.8%，報18182，本周反彈關鍵睇人民幣！人民幣離岸價上周喺1美元兌7.3水平幾度上落，後雖反彈至7.28水平，但似動力不足。至於恒指，受制下降軌（18450），收於20天線（18175）附近，呈十字星待變形態；保歷加通道仍在收窄，闊道不足6%，亦係待變格局。恒指若向上突破，可望挑戰月初高位18900水平，支持位睇前底17573。
人行降準放水而非減息放水，好處包括：①增加放貸量，銀行可多做放貸生意；②無影響銀行淨息差；③中美息差不變，人民幣貶值壓力減輕。降準利好內銀股，當中招商銀行（3968）盈利能力跑贏同業，可睇高一線。招行中期按年多賺9.1%，高於同業嘅0.8%至5.2%；淨利息收益率2.23%，高於同業嘅1.31%至2.08%；淨息差2.12%，高於同業嘅1.4%至2.06%。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com