新秀麗係著名行李箱公司，主要品牌包括Samsonite、Tumi、American Tourister、Gregory等。 (Jeff Greenberg via Getty Images)
止跌回穩？講緊嘅係中美關係。上周五晚，中國外交部宣布，應美國總統拜登邀請，國家主席習近平
將於11月14至17日赴美，舉行中美元首會晤，並出席APEC會議；美國白宮同步宣布，拜登、習近平將於15日會晤。今趟係習近平自2017年後再度訪美，亦係自拜登2021年上任後兩人再度會面，兼係自美國眾議院前議長佩洛西上年訪台、中美軍事交流中斷後，兩國元首破冰之舉。惟會面前，美方收緊對半導體出口管制，中方收緊對稀土出口管制，似作籌碼之用。
美股外幣即時報價 多國新聞任睇
姑勿論中美關係能否止跌回穩，畢竟雙方喺人權、台海、南海等議題上分歧較大，雙方要喺經濟發展同國家安全上取得平衡亦唔易，但兩國元首敲定會晤日期，大佬有偈傾，大市有憧憬！上周五，美股率先止跌，道指、標指、納指分別升1.2%、1.6%、2%；追蹤美國上市中概股表現嘅納斯達克金龍中國指數升0.5%；港股ADR比例指數高水80點或0.5%。不過，聯儲局主席鮑威爾一句「如果合適，將毫不猶豫地加息」，美債10年期孳息回升至4.646厘，美滙指數再觸106關。
港股連跌四日 舉頭三把刀
港股上周連跌4日，4支陰燭，收17203，失守10天、20天線，跌穿保歷加通道中軸。睇走勢，可能係11月初嘅反彈結束，亦可能係升破下降軌嘅後抽，若反彈結束，有機下試通道底16800水平；若繼續反彈，則有機上試前頂18300水平。港股近月受制三大因素——美債孳息、人民幣、中美關係，如今中美關係有緩和跡象，但美債孳息回升，推動美滙指數上升，拖累人民幣下跌。本周市場聚焦「習拜會」，以及科技股放榜。
另外，恒生指數公司將於周五公布第三季檢討結果，變動將於下月4日生效。今次季檢有別於過往嘅係——可能「首次」納入外國公司！恒指公司7月宣布，由第三季檢討開始，將喺香港主要上市嘅外國公司納入恒生指數及恒生科技指數選股範疇。單一外國公司佔指數比重上限為4%，整體外國公司佔指數比重上限為10%。外國公司係指喺海外（香港、中國以外）註冊，並喺海外經營主要業務嘅公司。有興趣喺藍籌換馬炒返轉嘅戰友，不妨喺外國公司中尋寶。
新秀麗交投旺 染藍機會大
本港上市嘅外國公司中，以市值計，頭五大為宏利（945）、保誠（2378）、普拉達（1913）、俄侶（486）、新秀麗（1910），市值分別為2,610億元、2,317億元、1,175億元、413億元、365億元，但宏利、保誠係金融股，而目前恒指成份股中已有4間內銀、兩間內險、兩間港銀，連同滙豐（005）、友邦（1299）、港交所（388），金融股佔恒指比重近三成半，估計唔會再加；俄侶則因地緣政治問題常被制裁，估計較難入圍；新秀麗、普拉達（Prada）入圍機會較大，而新秀麗成交遠超Prada（上周五分別為1.64億元、0.14億元），可睇高一線。
新秀麗係著名行李箱公司，主要品牌包括Samsonite、Tumi、American Tourister、Gregory等，根據市場研究公司Euromonitor數據，新秀麗所有品牌上年佔全球箱包產業市場2.6%，喺全球行李箱市場佔有率排名前十。該公司今年中期純利飆升1.7倍，今日將公布第三季同首三季業績，不妨留意。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com