金融High Tea 2012年7月24日
金融High Tea——唔抵得渴唔好玩
2012年7月24日
如果話上星期大市好似「揸𨋢」咁上上落落，昨日呢部「𨋢」就凌空急墮，恒指大跌587點，收報19053點，低位連19000點大關都穿埋，收市跌幅3％，跌幅冠絕亞洲，內地股市亦只係跌1.8％。
匯控大插 拖死大市
匯控(005)跌5.7％大插拖低股市，因為單計佢已經令恒指唔見咗174點，若加埋跌4.7％的國壽(2628)和跌4.3％的友邦(1299)，三隻夾埋無咗239點，大市急跌和銀行、壽險股大插同步發生。早前匯控走勢偏強，大市回落佢都好似唔想大跌，頂住個市，但昨日一跌，已將強勢破壞，又倒過來拖低個市。匯控捲入美國洗黑錢指控中，最後可能涉及大筆賠償，的確是不利因素，若大戶想借隊匯控插低大市，更加容易。
中環茶友話，若以大市而論，不要市好睇好，市淡睇淡，因為上落市可能走一段就回頭。但你睇非成份股的個股，就唔係上落市而係大跌市，即使本身質數唔差的國企和民企股都係不斷走弱，跌幅大過細股，這個現象只有一個解釋，它們若不是被對沖基金連番沽空狙擊，就是被基金不斷減持，或者兩者皆有，才出現大股弱過細股的現象，而且不斷惡化。
昨天看到一段新聞，真係睇到心都傷，有一個六十多歲退休女股民買股失利斬傷老公後跳樓身亡，買股買到要跳樓，何必呢？傳媒報道佢半年多前睇好發電設備股東方電氣(1072)，以每股20多元的價錢入貨，半年多來唔見咗20萬元，觸發情緒病出事。
國企大插 散戶跳樓
睇番東方電氣發生乜事，隻股在今年頭大市的炒浪中，在1月底上過25.3元的高位，之後反覆回落，若在年頭買咗，到上周五佢收12.98元，即係唔見咗一半，東方電氣昨日再跌5.6％到12.26元，現價6.5倍市盈率，1.6厘息率。
或許東方電氣在年頭炒得高咗少少，如今卻又跌得太殘，因為至今仲未見佢發盈警，中期盈利即使回落，都唔係大插那一種，但股價跌到凸。公司盈利有起落，例如東方電氣在07年盈利有22億，08年市況特差回落到4.5億，之後逐年回升，去年又上番30億純利，估計佢今年即使盈利下跌，都未必係一沉唔起之類，例如佢做核電電機，都係國家要大力投資發展的類別，一時股價甚至盈利回落，只要公司唔執，使唔使睇得咁悲？揸住佢又使唔使跳樓？若然跳完樓佢一年後又升番上20幾元又點計？
如今唔止東方電氣一隻，好多隻好有質素的國企股、民企股，股價都跌到七個一皮，正如樓價升到十分貴，可以升到更貴一樣，股價跌到十分殘，還可以跌到更殘。若果你唔識分析公司的價值，頂唔順股價的波動，特別本身有情緒病的話，講俗啲食得鹹魚但係唔抵得渴，否則搞出悲劇，認真無謂。
散戶買股，要知道股市係財富轉移之地，你以為佢升，佢就跌畀你睇，你反過來以為佢跌，佢就見底回升，你無心理上或財政上的承受力，去抵受股市的升升跌跌，真係死十個當五雙㗎咋。
陸羽仁
上一頁 下一頁
金融High Tea 舊文