金手指 - 孫柏文 2012年8月7日
金手指：歐未講印鈔條件 - 孫柏文
孫柏文11歲嗰年，好鍾意玩變形金剛，冇錯，係柯柏文。但幾想都好，只可以喺學校玩，原因係阿媽同老竇一路都唔肯買，惟有玩同學嗰啲。當你細個，又瘋狂哋想要樣得唔到手嘅嘢時，就會影響學業。我本來成績已經水皮，原來我父母一早已察覺到冇變形金剛，我嘅成績係雪上加霜。
後來先知，老竇其實想買變形金剛俾我，點知阿媽一路都㩒住佢。話咁樣只會縱壞我，令我覺得成績差就會攞到想要嘅嘢，有誘因攞低分。我當時打定輸數，因為父母態度強硬。
點知，有個禮拜五食晚飯，老竇突然望住我話：「我知你好想買嗰個玩具。不如咁，只要你開口話要，亦做到你阿媽同我啲要求，咁就帶你去。」嗰刻，我真係開心到成隻小學雞咁通屋跑。打電話畀我啲同學，佢哋仲興奮過我，因為要一隻用五架建築車群組成嘅超級機械人，就只欠我要嗰架。
呢幾日全球股市，就係我當年啲同學。我就係西班牙，老竇係歐央行行長德拉吉，阿媽當然就係揸正嚟做嘅德國央行(Bundesbank)。
結果？隔咗幾日，老竇就話：「學期尾啦，你就快要考試，你考到五個A，仲要中英都要A，同埋我日日突擊檢查你間房都唔再係成個狗竇咁，我就帶你去。」唔使問亞貴都知，最後嗰隻超級機械人冇喺我學校出現過。
殺埋熊證先跌？
舊年今日，記得一班末日博士，例如Roubini同David Rosenberg相繼投降轉看好，成為股市見頂嘅訊號。唔通今年亦要一樣？07年，資金自由行推動下，殺埋最高打靶點數嘅熊證嗰日見頂。唔通今年就要我啲熊證死埋先跌？歐央行、小學生好似雞仔亂走嘅嗰種興奮，突然幻滅係好殘酷㗎。不如你講明西班牙同意大利要做乜改革，即印鈔嘅條件，等啲好友可以死咗條心啦。
孫柏文
獨立股評人
本欄逢周二、四刊出
上一則: 青心直說：最寂寞私募基金 - 胡孟青
下一則: 投資的天空：留意本地地產股 - 張士佳
~TITLE_S~金手指 - 孫柏文 2012年8月7日 舊文