金融High Tea 2012年8月28日
金融High Tea——賭孤寒錢
2012年8月28日
■海通證券禁售期將屆滿，市場憂慮大戶為減輕借貸成本，令股價急跌。
市場盛傳歐洲央行可能正在制訂新的債券購買計劃，聯儲局或會推出比前兩次規模更大的QE，歐美股市㷫烚烚，美股亦創3年新高，亞洲股市就逆市向下，內地股市更係跌完又跌，上證綜合指數再插1.7%至2055點，創了41個月新低。
國家統計局昨日公佈的全國規模以上工業企業今年1月至7月的總體利潤較去年下跌2.7%，7月份更係跌5.4%。企業利潤正在逐漸下滑，分析普遍預計A股跌勢未止，十八大期間，唔排除阿爺會推政策托市，到時或會有反彈，但跌勢唔會逆轉，上證綜合指數可能去到1800點至喘定。
解凍股變股市炸彈
A股唔掂，港股好難有運行。恒指昨日早開市仍有錄得進帳，高開約60點，好快就由升轉跌，恒指收市跌81點報19799點。大市成交繼續少得可憐，只有393億元。
拖累大市向下的力量主要來自中資金融股及資源股。中鋁(2600)插4%，保險股跌幅顯著，國壽(2628)及太保(2601)跌超過3%。
港股最近吹無定向風，搞到一眾芬佬一頭煙，更有甚者，係另一批炸彈又會好快殺到。呢批炸彈就係重磅股解禁潮，當中最快到又係最勁嘅係友邦保險(1299)。大股東AIG今年3月初極速大手配售友邦，當時承諾6個月內不會再減持，AIG手頭呢批總值逾500億元股份，唔夠10日就可隨時全數沽售。
另一待售股是今年4月中上市的「集資王」海通證券(6837)，6個月的禁售期，亦將屆滿。當中有兩名大戶係借錢認購，海通招股價10.6元，昨日收市插4.4%，得番8.91元，半年虧蝕16%，市場憂慮大戶為減輕借貸成本，被逼斬倉。仲有一隻備受關注的大股係最大私募基金凱雷持有2.38%太保(2601)。兩股昨日急跌，可能係投資者走為上着所致。
大市不離上落格局，股民各師各法，有中環茶友話，股市搵食唔容易，最近自己都要賭吓孤寒錢。乜嘢叫賭孤寒錢呢？茶客笑住口解釋，話炒股最緊要順勢，過去佢買股，目標至少賺番三、五成，落盤時絕對唔會慳住一、兩個價位，無論買賣都係市值出擊，務求睇中目標就一定得手。不過，最近個市升三日、跌兩日，好多股份抽高完又跌番，坐貨長賺暫時無得玩，佢都要玩吓短炒過手癮，但由於波幅好窄，咁出入價位就無辦法唔計住數啦。
炒醜股難度高
賭孤寒錢講易做就難，茶友話，咁樣炒股食水淺，而且質素好的股價，始終會升升吓變貴咗，所以揀到理想目標，放佢出嚟游水博高沽低手查，其實好考功夫。不過，佢始終認為市況難測，買股一定要有兩手準備，走短線之餘，都要做好萬一失守坐艇，隻股有得守至得，故此佢對買醜股博反彈，一直戒心好大。
茶友話，買醜股博反彈呢樣嘢，係高難度動作，因為買股票即係入股一盤生意，做生意無話實唔死的公司，一家經營不善的公司，可以蝕完再蝕，問完股東伸手再蝕清都有，故此買醜股必須揀公司管理層有咁上下質素，同公司只係一時受客觀環境衝擊盈利下跌的公司，但邊啲股份符合呢啲標準，未必係普通散戶或街外人能夠理解，所以想買醜股博反彈，最好係自問對相關公司有獨到的認識，否則佢就寧願揀啲有派息同盈利的公司，賭吓孤寒錢過日辰好過。
陸羽仁
上一頁 下一頁
金融High Tea 舊文