金融High Tea 2012年8月9日
金融High Tea——穩股換馬弱股
2012年8月9日
恒指重上20000點大關後再升有點阻力，昨日牛皮上落，但又跌唔落去，恒指微跌7點收市，收20065點，有在20000點樓上慢慢企穩之態勢。
紐約州指控渣打(2888)洗黑錢20000億港元，渣打昨日暫時止瀉，佢上日在倫敦大插到149.1元，但昨日在香港市無再插，反而升0.8％到159.3元。雖然不少讀者問何時撈底，但我又覺得大市平貨好多，渣打跌得未夠深，現價撈底有一定風險，怕佢股價反彈完要再向下試底。
渣打事件令投資者納悶，美國接連出招針對匯控(005)和渣打(其實還針對另一家英資銀行巴克萊)，但這些銀行的「劣跡」其實已經持續了10年時間，為甚麼選擇在這個時間爆出來？我覺得似針對英國多過針對香港，英國已有反對黨議員質疑，美國此舉是想打擊倫敦作為金融中心的地位，促使金融交易回流美國市場。美國和英國本是兄弟，如今為爭生意，兄弟都無情講，最慘係累死班股東。
國泰意外見紅
國泰航空(293)派成績表，上半年業績意外地見紅，雖然佢早前發過盈警，但外界唔預佢有虧損，結果國泰公佈上半年轉盈為虧，蝕9.4億元，每股基本虧損23.8仙，不派息，去年同期盈利有28.1億元。上半年營業額為488.6億元，同比升4.4％，即係話國泰生意唔係差得咁緊要，上半年貨運收入跌7.6％，油價等成本高企是致命傷，當然，佔佢盈利3成的貨運受壓，亦係生意增長得唔夠多的主因。
睇番過去5年，國泰主要在2008年金融海嘯爆發那一年蝕過錢，08年上半年蝕7.6億，到全年更勁蝕87億，大家唔好唔記得，當年5月開始大爆特爆，雷曼等銀行相繼出事，油價在當年7月升上147美元一桶的歷史高位，航空公司客運生意大減，加上油價比天高，所以國泰勁蝕87億咁多，今年雖然差，但照計無08年咁慘啩？我估關鍵在油價，航空業人士講，油價在75美元以下時，航空公司生意好做，今年油價上過110美元，而家都要93美元，油價高飛長途機差不多無利可圖，航空公司生意難撈，若未來幾個月油價再上，佢哋要輸多啲。
國泰在09年3月跌到6.9元的低位，昨日佢大跌4.3％，仍有12.36元，好過當年好多，單從股價計安全系數唔係好夠，估計未來雖然不一定再跌，但難免弱於大市。
外圍大市氣氛好轉，資金漸漸由較安全的穩陣股轉去風險較高的弱股中，例如電股早前好正，由於發電用的煤價下跌而電價不跌，內地發電行業經營狀況顯著改善，資金要避險就入電股、電訊股這些份中。到近日市場風險胃納提升，資金就從較安全的電股撤走，如華能(902)就由個幾月前高位5.85元，回到昨日的5.13元，已經唔見咗12％。資金轉炒弱股，好多早前積弱的紅色股近日都有炒作。
炒雞股要用腦
但我提醒大家，短炒一日半日無所謂，但略為揸長少少的話，一定要留意那些弱股如今的經營狀況究竟已經開始改善，抑或還有可能惡化，以航空股為例，油價可能再升，但生意未見起色，業績似未見底，所以航空股極短炒反彈唔出奇，但你唔見油價回落，都唔唔好買佢哋長揸喎。另外又如思捷(330)，前日話換CEO炒高28％，昨日定一定神回番12％，你摸埋去即刻斷手，所以炒弱股反彈，要用腦諗吓隻股啲生意短期內會唔會好番，若然彈得太癲，就唔好諗食胡先啦。
陸羽仁
上一頁 下一頁
金融High Tea 舊文