金融High Tea 2012年10月16日
金融High Tea——內地水源漸鬆
2012年10月16日
■分析預計發展商第四季會大手出擊，估計單係第四季就有近6000個單位推出。資料圖片
內地昨日公佈一堆數據，9月通脹率(CPI)回落，同去年比只漲1.9%，重回到1字頭，工業品出廠價格(PPI)同去年相比降3.6%，顯示企業盈利仍會向下，內地股市一度跌過近1%，後來跌幅收窄到0.3%收市，港股好硬淨，恒指微升11點收場。
中國重回低通脹年代，2011年全年中國通脹率較去年同期上漲5.4%，今年年頭政府工作報告原本預期通脹率控制在4%左右，但經濟快速回落，如今超額完成。人民銀行副行長易鋼預期，全年通脹率會低至2.7%左右。
過去話阿爺唔敢放水怕推高通脹，現在通脹遠比年初預期為低，預示阿爺可以較大力放水，不過唔係減銀行存款準備金率，而係減息。國務院發展研究中心金融所研究員巴曙松話，工業品出廠價(PPI)持續回落，顯示企業盈利壓力依然在加大，盈利回落還會持續一段時間。PPI回落提升了企業實際融資成本(因為產品出廠價下降但利息開支不變)，成為支持減息的理由之一。
貨幣供應超標
減息可能令銀行息差收窄，對內銀股不利，昨日內銀股走勢個別發展，建行(939)升0.5%，工行(1398)卻跌0.4%，數據未對內銀股有影響。
另一個數據有啟示性，早前央行公佈9月份銀行新增人民幣貸款僅為6232億元，是年內第二低，亦低於市場預期，股市反應不大。昨日公布截至9月尾，廣義貨幣供應量(M2)同去年相比增長14.8%，超過年初確定的14%的目標，是自去年6月尾以來的最高，M2數量多少直接反映市場有無水，M2上升顯示水多了，銀行貸款增長少，但錢多了，原來是9月份的社會融資規模大升，9月有1.65萬億元，分別較上月增加4041億，和上年同期比較增加1.8倍，當中特別是企業透過發債券融資和信託貸款增長尤為突出。
睇完呢啲數字，就係9月銀根開始鬆番，所以M2貨幣供應才會有較大增長，內地水源漸鬆，有利經濟回復，對股市亦有推動作用，但新增水源主要不是來自銀行，對內銀股盈利增長有壓力。
淡市中表現最好係地產股，恒生地產分類升0.5%。近期一手樓旺市。貴絕新界西北區的屯門站新盤，平均呎價去到8900元水準，附近二手樓都係賣緊5300元，貴咁多都掃清。
地產股炒開盤潮
一手樓需求強勁，二手樓銷情相對水靜鵝飛。上周末中原十大屋苑只有25單成交，按周下跌25%。分析預計發展商第四季會大手出擊，趁明年一月《施政報告》前掠得就掠，估計單係第四季就有近6000個單位推出。
有分析指本地樓市旺場，係聯儲局推QE3發揮威力，令本地樓市起泡。國際貨幣基金會(IMF)睇法有少少唔同，IMF駐香港代表R. Sean Craig上周五表示，雖然本港樓價高企，但未見泡沫，原因係目前供應緊張，低息環境持續，需求仍強勁，他預計短期樓價不會下跌。不過，政府已推出可行的壓抑樓價的措施，金管局對限制樓價升幅作出快速的回應。講真，係目前水平，樓價只要唔跌，地產商已經賺到笑，本地地產股普遍跑贏大市，其中今個月有大盤推出的恆地(012)表現最好，升2.5%，收56元。
陸羽仁
上一頁 下一頁
金融High Tea 舊文