金融High Tea 2012年10月30日
金融High Tea——炒樓出書 末日啟示
2012年10月30日
■政府打壓樓市，物業代理食到應，美聯昨大插14.5％，收報3.83元。
政府出招打樓市，恒指首個交易日跌34點都算跌得少啦，期指今天結算，唔知係唔係大戶肉搏左右大市。
昨日中資金融股中以內銀股表現較突出，內銀「九行」，除了交行(3328)挫0.4%，其餘全線向上。內銀股有好表現，主要原因係第三季業績表現理想。內銀股陸續公佈業績，已發表成績表的中行(3988)、建行(939)及農行，業績都好過市場預期。恒生地產分類指數3.7%，恒生中國H股金融行業指數漲0.8%，恒指就收21511點。
內銀股力撐大市
業績打頭陣的中行第三季盈利按年升17%，主要由於集團第三季淨息差按季擴闊8點子，令淨利息收入按季上升3個百分點，加上不良貸款率下跌至0.93%，為全世界最低，不過唔少分析認為不良貸款率跌到咁低，與中國現狀有好大距離，質疑中行資產負債表的可信性，即使盈利好過預期，瑞信維持中行「中性」評級不變。
睇番地產股就至少跌番4％先落得樓，大股之中長實(001)跌4.7％，新地(016)跌5.1％，恒基(012)，新世界(017)和信置(083)咁啱都係跌6.4％。跌幅多少反映地產商去貨的情況，長實出晒名貨如輪轉，有賣樓紙就狂沽，新地今期賣屯門盤都好積極，基本上今年都收夠籌，跌少啲好應該。四叔一直講股平過樓，話自己隻股好落後，有少少暗示樓貴，但佢哋去貨唔算好狼，而家遇上政府打壓，所以就受力啲啦。
講傷唔夠物業代理傷，佢地食到應，美聯(1200)大插14.5％，由上周五收的4.48元，跌到3.83元，不過跌到咁仲有27.5億市值，未算平也。美聯呢個月5日仲升上5元的高位，等如36億市值，佢舊年純利倒退75％到1.3億，但今年至6月底半年純利都有1.28億，投資者以為佢有啲景起勢咁炒，點知遇上政府出招，寒冬即至。
代理業個頭開到好大，通街都係舖，成本好高，兩年前推出特別印花稅二手炒作大減，主要靠一手，如今向內地客徵埋15％印花稅，做豪宅針對內地客的代理真係面色發白，我估都係代理股有反彈，無升幅，雖然跌得多時反彈都彈得勁，但由於難有強勁業績支持，短炒易長揸難。
放長少少睇，地產股係咁，樓市都係咁。你話政府出呢兩招會唔會馬上打死樓市，我話無咁快，好似老婆想謀殺親夫，俾啲砒霜佢食，只要份量唔太大，食少少食少少馬上死唔去，老公食完肚痛吓，習慣咗啲毒藥，行得走得，只是長年累月食少少，最後終於會「摜低」。好似對外地人收15％特別印花稅，你唔好話呢招唔毒，但係又唔夠份量毒到個樓市即刻死，無咗外地人買樓，過幾個月本地用家番出來，睇短線樓市跌完好可能會彈番上。
樓市短期走勢難測，大方向卻易估，就係在超低息環境下唔會死，但被政府打得十次八次已經中晒毒，受重創，外面睇唔多覺，最後環境息口狀況逆轉時，超貴的樓市跌起上來，亦唔係人咁品。我見到有80後出書教人加按借錢炒樓賺大錢，回想到2007年也人出書叫借錢炒股發達，見到呢啲書，就知道邊個市場升得過火，睇番當日叫人炒股者如今的狀況，都估到如今叫人瞓身炒樓者5年後的未來，呢啲書係「末日啟示錄」。
陸羽仁
上一頁 下一頁
金融High Tea 舊文