金融High Tea 2012年10月31日
金融High Tea——啃親
2012年10月31日
昨日期指結算，港股繼續跌，跌了82點，主要由內銀股貢獻，三大重磅巨股工商銀行(1398)跌1.8%，建行(939)跌1.4%，中國銀行(3988)跌1.6%，呢三隻藍籌銀行股貢獻了56點跌幅，佔恒指跌幅近七成。
股票下跌好多時都來自一些無名腫毒，近日內銀公佈的季度業績都見得吓人，好多都超乎預期，例如招行(3968)上一日公佈第三季純利上升16.6%至114.1億人民幣，業績較預期強勁，主要是信貸成本較低。但招行昨日不升反跌喎，跌4.8%收14.2元，業績超預期完全唔應該係咁款。
當然，有大行睇完招行業績報告，話有隱憂，例如德銀就話怕招行資產質素轉弱，因為招行的撥備覆蓋率由今年6月底的404%，降至9月底的377.4%，即係減少撥備覆蓋範圍，德銀因此維持招行「持有」評級，目標價亦只係13.81元。
德銀力批招行隱憂
招行跌咁多，甚至內銀整個板塊都跌，當然和業績不盡完美有關，但係唔係值得一日跌4.8%咁大問題，又值得商榷。我覺得內銀股急回，就好似一個人餓咗好耐，突然放大盤食物喺佢面前，佢好開心咁質落口，質得兩質，食得太急就啃親。你睇招行股價，9月6日先見1年低位12.02元，跟住急急反彈回升，到10月22日已上到高位15.12元，短短個幾月，升咗26%，升得太急太快，9月尾打後更是一條氣咁升，無認真回吐過，升得咁急唔啃死就怪，到公佈業績，有好消息是應份，好消息中有缺憾就大問題啦，所以股價借勢回。大市都有少少係咁，之前十連升，升得太急太快，結果就連續幾日回吐。
工行收市後公佈第三季業績，季度營業收入1309.1億元人民幣，按年增11.6%；季度純利增14.9%至624.4億元人民幣，每股盈利0.18元，工行季度純利好過市場預期，主要因為貸款增長較預期高，而壞帳撥備較預期低。
工行累計首三季純利為1856億元，同比增長13.3%，如今只差第四季業績，但估計內地經濟第四季會好過第三季，所以工行全年純利有望接近這個增長比率。工行現價市帳率1.49倍，市盈率6.8倍，息率4.9厘，若工行今年全年盈利能增加13%，佢今年預計市盈率會跌到接近6倍。你可以唔信內地銀行帳目，但我覺得美國的銀行帳目亦不見得更可信，以工行這間全球市值最大銀行計，呢個預計市盈率真係幾低。
復藥破底新股未掂
工行同樣係近期升得太急，出完業績，或者再觸發好消息出貨，佢昨日收5.03元，股價會再回深少少，去到20天線即4.89元左右，可以吸納睇中線。
復星醫藥(2196)上市首日跌8.1%，收10.84元，佢一開市就插，十點未夠已插到低見10.38元，比招股價11.38元低12%，相當恐怖，可能好多人都定咗10%打靶，到打得七七八八，隻股上番少少，收市跌8%，散戶認咗都係重傷。
今年新股難玩，復星醫藥已經係自7月份以來最成功的上市個案例，因為一直都無大股上到市，復星的認購反應仍屬平淡，只能以下限定價，上市破底已是必然結局。燒冷灶變咗燒損手，經此一役，散戶更加唔敢玩新股IPO。
陸羽仁
上一頁 下一頁
金融High Tea 舊文