金融High Tea 2012年11月21日

金融High Tea 2012年11月21日
金融High Tea——奶粉錢
2012年11月21日
■城電老闆王維基，過去做過歌利亞，擊倒巨人香港電訊，賺取幾十億計的身家，今次再挑戰無綫，若論體型無綫無當年電訊咁巨型，但論身手同靈活性，就遠勝電訊。資料圖片

美國政客打曬開口牌話財政懸崖拆得掂，歐美股市大翻身。港股就仍然審慎，外圍股市爆升，投資者認定係近期財政懸崖這個不利消息拖累，跌得好傷。跌得多，自然反彈得勁，相對港股受這個問題困擾唔大，大家見個市一彈都唔敢追貨。

恒指朝早趁高興炒一炒，最多升216點，午後就回歸現實，跟住A股回軟，倒跌收場。內地A股唔掂，繼續拉埋港股落水。恒指最終近全日最低位收市。恒指倒跌34點，收21228點，國企指數跌63點至10227點，大市成交485億元。

內地傳媒報道，人行已核准中國證券金融公司在全國銀行間債券市場發行上限30億元、90天短期融資券。分析認為，為轉融資業務提供了新資金，也意味着銀行和股票市場互通獲得重大突破。所謂轉融資業務，係指由銀行、基金和保險公司等機構提供資金和證券，證券公司再將這些資金和證券提供給融資融券客戶。市場預計一旦全面開通，將有過千億資金流入股市。

人保上市壓住保險股
不過，中資金融股未有受惠好消息，在人保上市前夕，中資保險股表現較弱，「五保」全線下跌，其中國壽(2628)及平保(2318)跌超過1%，新華保險(1336)跌3%。

人保招股，由於傳出公司質素不低，有人擔心會吸走其他保險股的資金，令到中資保險股受壓，加上市場又傳出匯控有意減持平保，令到中資保險股成為弱勢板塊，睇嚟係人保上市效應消散前，呢個板塊都無得威。

城電高調向政府施壓，要求發出免費牌照，終於令到「大佬」出手，無綫早前正式去信行政會議，向增發免費電視牌照提出六大質詢，一場巨人與歌利亞之戰正式展開。

城電老闆王維基，過去做過歌利亞，擊倒巨人香港電訊(即係電盈前身)，賺取幾十億計的身家，今次再挑戰無綫，若論體型無綫無當年電訊咁巨型，但論身手同靈活性，就遠勝電訊。

過去幾十年，無綫不斷處於戰爭狀態，雖然佢經常處於上風，但無論係麗的麥當雄年代的「千帆並舉」攻勢，到周梁主政的銀彈戰術，都曾經有過威脅，最後無綫都安渡危機，故此管理層深明打仗要勞逸結合，消耗對手實力，這種心態同當年香港電訊當王維基無到，相距何止十萬八千里。

無綫來年廣告有陰影
好似今次發牌戰，無綫一直唔聲唔聲，咁已經搞咗王維基一千日，現在形勢吃緊，佢先至出手同你打輿論戰，可以估計打完輿論戰後有法律戰，再之後先開始打真軍，王維基遇着個身材與身手兼備的霸主，就算打贏都係慘勝，小股東要有長期捱打的準備。

無綫老闆現時幾個老闆最大的顧慮，係不久前先以高價喺創辦人邵爵士手上買入無綫股權，現在面對挑戰，必須全力以赴去護盤，因為佢哋唔係好似邵爵士咁，盤生意自己搞出嚟，已經賺咗幾十年錢，大家真金白銀去收購，若然有失閃，就會蝕入肉。

另一個不利無綫的消息，係政府現在正諮詢緊收緊奶粉廣告，若然政策落實，奶粉客乃電視重要客戶，若然奶粉商減少賣廣告，影響直接入肉之餘，仲響起咗警號，係奶粉廣告都要勒緊以至禁止，其他產品隨時都被政府干預，屆時生意肯定大受影響，仲連帶影響埋廣告等好多行業，雖然建議仲傾緊，呢筆奶粉錢的即時影響可能令無綫管理層仲擔心過發唔發牌。

陸羽仁
上一頁 下一頁

金融High Tea 舊文