金融High Tea 2012年11月8日
金融High Tea——炒「馬市」 放水局
2012年11月8日
有條小學生IQ題，你認為「股民最鍾意買邊隻馬？」答案係「奧巴馬」。
美股杜指在選舉日搶先升咗133點，但港股昨日早段相當玩嘢，逆向而行玩大插，唔升仲要跌133點，帶埋大陸股市向下，午後就借住奧巴馬奪魁的消息，大幅炒番上，恒指以全日最高位收市，漲155點至22100點，成交升到641億。
奧巴馬勝選，唔使到昨日下午先睇到，但大市咁先插後升，就將一眾好友玩謝，然後才炒上，若然你係好友被佢夾死後見到大市係咁升，EQ弱啲真係頂唔順。
早前環球金融市場都受呢匹「奧巴馬」唔知跑唔跑得出影響，有點擔心羅姆尼當選就會停止聯儲局每月印鈔400億美元的放水計劃，所以美元係咁彈、外匯軟、黃金弱、股市跌。選舉當日奧巴馬已露出勝選苖頭，唔怕聯儲局主席伯南克因羅姆尼當選而炒魷，放水大局已定，大炒「馬市」，故此油、金、股、匯走勢都偷步逆轉，美元轉弱，風險喜好加強。呢個趨勢在昨日香港開市前都顯露晒，大戶偏要在港股早段玩完震倉先至升。
搶先去炒十八大
大家唔好忘記中共十八大今日召開，新領導下周初登基，市場預測中央會出台多項刺激各行各業政策，搞旺個場，慶賀新貴上場。A股難買，買H股就比較方便，閃人又易，所以炒味甚燶。
昨日報恒大地產(3333)10月銷售旺場，創了單月新高，至10月底完成全年銷售目標91%，可以炒恒大轉勢。德銀唱好，給予「買入」評級，睇6.16元。恒大昨日發威，大幅抽升9.3%至3.88元收市，美中不足的是最低只見3.67元，想買平貨無乜機會。
昨日除了恒大無乜巨型內房股升，中國海外(688)只升0.2%市跑輸大市，可見有基金把資金從其他內房股轉入恒大，都唔話中國海外和華潤置地早已過千億，連龍湖市值都有762億，市盈率高達9.3倍，恒大市值只得581億，只有4倍市盈率，恒大去年盈利反映前年賣樓數，去年賣樓已增至800億，若今年買樓總量和去年一樣，今明兩年恒大盈利都唔會跌，我估佢後市仲有得去。
保大棄小堪玩味
昨日就有唔少板塊好有鑊味，炒得最勁的仍是太陽能股。內地《南方都市報》又爆新猷，話由於中國光伏太陽能企業負債纍纍，截至今年上半年，中國最大的10家光伏企業債務累積超過1100億元人民幣，有不少企業面臨破產的風險。近日商務部、國家能源局、財政部及工信部等四部委和36間銀行機構代表召開秘密會議，決意對光伏企業實行「保大棄小」，增強競爭力。
香港上市叫得做太陽能龍頭企業主要係保利協鑫(3800)，佢在多晶硅和硅片兩個環節都係龍頭巨企，這個「保大棄小」政策對它最着數，保利協鑫前日勁升7%，昨日再漲8%至1.61元，佢由9月中的低位反彈，已經勁升超過42%。不過比起去年4月底時高位的5.55元，仍然勁跌七成九，若從好處去講就仲有水位，咁樣的龍頭企業只得249億市值，只是無數中型房地產商的規模，內地不會任由這些新能源巨企死掉。
估計太陽能股反彈勢頭未完，除了內地有政策外，奧巴馬一向主張擴大發展太陽能等新能源，佢連任有利太陽能股，有利環球相關股份投資氣氛也。
陸羽仁
上一頁 下一頁
金融High Tea 舊文