金融High Tea 2012年12月20日
金融High Tea——唔食A餐食B餐
2012年12月20日
美國政客的財政懸崖談判，開始進入比較實質性的討價還價階段。成為市場焦點的內地股市，昨日衝高回落，上證綜指收市靠穩，收市微跌不足半點，外圍氣氛都算可以。
毛毛雨愈落愈大
港股最近大幅飆升，內地A股繼續在低位徘徊，導致AH溢價股指數再創新低，上周跌到94.4點。好多銀行、保險股都出現了A股比H股大幅折價的現象。由於外國人不能隨意買A股，因此只能透過QFII投資A股。至有資料顯示，目前QFII持股市值佔A股流通市值的1.6%，只屬毛毛雨，但比今年4月、5月時持股1.1%已經有顯著的上升。由於銀行、保險等藍籌股出現大折價，不僅便宜，而且還能享受未來人民幣升值的收益，QFII重點投資對象都係重磅藍籌。
中國A股吸引眼球，港股唔會差得去邊，內地A股昨日雖然牛牛皮皮，恒指在熱錢湧港力挺的情況下，收市報22623點，保持住129點升幅。國企指數跑贏大市，升0.8%至11388點，成交微增至628億元。第一上海證券策略師岑智勇表示，只要資金持續湧入，配合中國中央經濟工作會議中的政策內容，以及年關將近的「粉飾櫥窗」效應，恒指及國指不難在年內持續創出高位。
地產股昨日反彈，跑贏大市。業內人士認為，資金持續流入本港，推高本港資產價格，加上自08年金融海嘯後，高達6000億元資金停泊在港，由於熱錢無出路， 明年樓價將持續上升，特別在三月後至明年底，辣招將失效，仲話上次額外印花稅(SSD)出台後，盤源顯著減少，今次推SSD加強版後，盤源未有大幅減少，二手呎價不斷上升。他估計明年大部份樓價及租金的升幅，都來自工商舖市場。
有朋友問起點睇領匯(823)等房產基金，昨日大市上年內新高，但領匯仲要跌2%，得番38.9元，股價跌穿上升軌，揸住佢唔知點算。我話唔好睇得太深奧，呢一期資金風險取向提升，所以沽領匯呢類收息股，轉揸風險股，一換馬就對房託股有沽壓，睇嚟呢個換馬潮未完，無貨唔好太快摸入去買房託，小心要吃眼前虧。
領匯升市反捱沽
你睇領匯從高位43.1元跌咗9.8%，但仍然係9.5倍市盈率3.5厘息，以房託嚟講唔算好抵，沽咗佢買內銀有着數，建行(939)7.6倍市盈率、4.6厘息，工行(1398)7.6倍市盈率、4.5厘息，只計派息都高過領匯喎，都唔好計以市盈率股價平啲、增長快啲。
去年證券界話到內銀以至整個中國都好似要爆煲咁，而家睇落爆唔成煲仲會反彈，所以就要反手揸啦，昨日一眾內銀都升，建行升1%，工行升0.7%，都跑贏大市升幅。有時投資界好化學，好以去茶餐廳食快餐，今日揀A餐，明日唔食A餐揀B餐，要轉軚都轉得好快。
睇好內銀股的人開始增多，巴克萊昨發表報告，提高內銀股目標價20%。巴克萊對中型銀行股交行(3328)及重農行(3618)特別看好，將兩行的投資評級，由「與大市同步」調整至「跑贏大市」，目標價升至6.94元及4.48元。
中央經濟工作會議話要為改革定下時間表，估計金融改革係焦點之一，政策出台時會利好內銀股。
陸羽仁
上一頁 下一頁
金融High Tea 舊文