金融High Tea 2013年1月2日
金融High Tea——新年新炒作
2013年1月2日
美國在新年前差不多跌落懸崖，美股大跌，但港股在除夕半日市唔肯大插，只是微跌9點收場，在22656點高位年結，全年累升4222點，港股俾內地股市拖住後腿都升23%，都算係咁啦。
內地經濟向好
美國未收市前已傳聞執政民主黨與反對黨共和黨的洽談已近磅，好大機會只向年收入40萬美元以上的個人才會加稅，大部份人不受影響，消息刺激杜指炒上，除夕日升166點，收13104點，差不多收復晒之前的失地，美股收市後美國總統奧巴馬更宣佈兩黨已達成協議，對香港新年開局影響正面。
既是自由開局，新年向上炒作的機會較高，問題係炒唔炒得長啫。港股無乜性格，主要睇美股和內地股市兩個大佬，內地今年走勢向上，新年前匯豐出中國12月採購經理指數為51.5，明顯高於11月的50.5，創2011年5月以來最高紀錄。官方在假期間公佈12月份採購經理指數報50.6%，和上月持平。匯豐指數傾向中小企，官方指數傾向大企業，意味中小企復原狀況較好。
美國經濟掂唔掂，左右環球股市大局，睇好派有一個另類觀點值得講講，就係美國發現蘊藏量巨大的頁岩氣，這是非常規天然氣，開採困難，但美國已有先進開採技術可以用到這種能源，令依賴外地供應石油的局面改變。
香港頁岩氣股亦炒到七個一皮，華油能源(1251)升3.7%；安東油田(3337)升7%；宏華(196)大升18%，就係炒呢味。去年全年華油升咗2.1倍，安東升咗3.8倍，宏華升咗3.5倍，炒味極濃。
頁岩氣繼續玩
有分析話開採頁岩氣技術掌握在美國手裏，中國未完全搞得掂，從概念到對個別受惠股的業績上體現，當中有好大段路。不過中國都已開始大規模發展頁岩氣，計劃到2015年，初步實現規模化生產，頁岩氣年產量達到65億立方米，然後下一個五年到2020年，頁岩氣產量大升到600億至1000億立方米。去年中國已進行兩輪頁岩氣開發區，很多電力和能源新成立的國企參與，有民企抱怨，很多好的頁岩氣區塊並未對外開放，真正氣源比較好的區塊都已登記在中石油(857)和中石化(386)名下。
美國開發頁岩氣壓抑了油價，對主要做上游(即採油)的中海油最不利，對主要做下游(即煉油和分銷)的中石化最有利，加上內地通脹低，阿爺必要時會容許成品油價上調，中石化的成品油分銷業務會受惠。你睇中海油去年下半年股價走勢幾平坦吓，無乜料到，未來仍然要避開佢，反而中石化就一級一級咁上，未來仍然可看好。
至於細細隻的頁岩氣概念股有六、七隻，股價成倍成倍咁升，我估今年會炒得更激烈，或者有更多相關概念股浦頭，頁岩氣由勘探、鑽井、開採、淨化、輸送、儲運，有好長嘅產業鏈，但良莠不齊，魚目混珠者不少，炒作這類股份真係要有止蝕防身，愈多好消息愈係出貨的時候，若大幅回落時，唔好咁老襯死坐唔走呀。
陸羽仁
上一頁 下一頁
金融High Tea 舊文