金融High Tea 2013年6月6日
金融High Tea——過江龍焗大膽
2013年6月6日
■中海外用45.4億投得「港人港地」，落成後要賣1萬元一呎先有肉食。
■領匯派成績表，去年可供分派利潤增幅14％，仲首次表露有沽售物業的意圖。
大市無力，甚有怕美國收水的感覺，日股昨日下午跌勢轉急，收市大跌3.8％。港股收市跌216點，恒指已穿250天線，差不多出現10天線下穿250天線的死亡交叉，感覺唔係太好。
昨日跌得比較多的是地產股，長實(001)唔見2.8％，得番105.8元，做代理的美聯(1200)昨跌3.2％去到3.18元，都係近兩年的低位，睇呢個浪個勢，好有機會插穿埋試新低。中環茶友話，政府辣招搞到個樓市靜如深海，再加上美國出現收水疑雲，地產市場陰雲密佈，地產股點有運行。
中環茶友話，你唔好睇個市好似跌唔多，但好多股份跌唔少，例如隻新世界發展(017)，1月高位15.12元，?家得番11.98元，從高位回咗20％，買咗唔識走好易損手。按老外以高位跌兩成為進入熊市的定義，新世界都有熊味。我再加一句，新世界由2011年底供股時見低位6.13元，一直沿住一條完美的上升軌咁向上，年初見頂後開始走樣，最近跌穿13元已跌破上升軌，破位向下，恐怕仲有一個大浪尋底。
勇進投地可能摸頂
政府在收市後公佈，兩幅實施「港人港地」的啟德住宅用地的招標結果，各以22.7億元批予中國海外(688)，地價總計為45.4億元，市場計樓面地價成本約5000元一呎，落成後要賣1萬元一呎先有肉食。
有朋友問我點睇，話內地發展商咁勇買地，對樓市係好消息呢？我話內地發展商開始進軍香港，只係將香港當做中國其中一個大城市，中海外已買咗3、4幅細地，而內地龍頭發展商萬科早前已夥拍新世界入市買地。中海外打贏所有本地發展商，投到兩幅有限售予香港人限制的土地，當然係出價進取所致，但我就唔認為係好消息，反而證明本地發展商都睇淡，唔肯出價所以投唔到。
我舉咗20幾年前信置(083)的投地手法做例子，信置係新加坡過江龍，投地手法勇進，每每投出新高價。當時有人笑信置過勇，但有地產界老行尊不以為然，話本地發展商有好多門路買平地，如買新界的乙種換地權益書、買農地、收舊樓之類，但信置作為香港地產市場新丁，唔喺拍賣場好勇咁舉手，根本買唔到大塊地，20幾年過去，信置捱過新丁期，就愈做愈好。呢個故事話俾我哋聽，過江龍投地焗住大膽，小心佢哋係摸咗樓市個頂。
太陽能股逆向炒高
領匯(823)昨日派成績表，去年可供分派利潤增幅14％，比對上一年的19％增幅低，可見領匯的租金增長動力正在減弱中，昨日股價跌2.5％。領匯話有人出啱價，不排除沽出手上物業，這是領匯首次表露有沽售物業的意圖，可以當一個樓市快見頂的先兆。各位經紀哥哥若有大客夠實力炒領匯商場，快啲殺上去試價嘞。
歐盟委員會不顧德國、英國等18個國家反對，宣佈昨日開始徵收產自中國的太陽能電池板及關鍵器件11.8%的臨時反傾銷稅。如果中歐雙方未能在8月6日前達成解決方案，臨時反傾銷稅率將升至47.6%。由於11.8%的稅率較市場預期低好多，中國光伏股反向地全線造好，龍頭股保利協鑫(3800)最火爆，勁升超過6%至1.92元。主因係高盛指協鑫係反傾銷稅中唯一的離岸太陽能的結構性受惠企業。高盛將協鑫的評級升至「確信買入」，目標價看3元。我就話未來光伏股仍受歐洲消息影響，大家要小心睇住嚟炒。
陸羽仁
上一頁 下一頁
金融High Tea 舊文